Ehangano lyokuyalula aantu moshilongo lyoNamibia Statistics Agency (NSA) olya ti aantu ya thika poopelesenda 94.5 oya yalulwa.
Omwaalu ngoka okwa li gwa gandjwa pethimbo lolweetho olutitatu ndoka lwa tameke momasiku 09 ga Okotomba nuumvo.
NSA okwa ti, aantu ye thike poopelesenda 4.5 oyo ayeke inaaya yalulwa.
Omukuluntuwiliki mehangano lyoku yalula Alex Shimuafeni okwa popi kutya omayalulo oga li ga topolwa momalweetho ge li gatatu, ihe momalweetho ngoka gaali ga pu, Aanamibia oyendji oya yalulwa.
“Olweetho nduka olutitatu otalu ka kwashilipaleka ashike uuyelele mboka wa gandjwa nale, oshowo okuyalula mboka inaaya yalulwa nale,” ta fatulula ngaaka.
Ta popi kutya elalakano olya li lyokuyalula aantu ayehe moshilongo, onkene otaya tsikile okukumagidha mboka inaaya yalulwa ya kwatelwe molweetho ndoka lwahugunina.
Okwa kumagidha natango kehe ngoka inaa yalulwa natango opo a kwatathane noombelewa dhomayalulo miitopolwa yawo.
“Omayalulo gaantu nomagumbo oga simana, oshoka ohaga ka longithwa okuthaneka elongekidho lyonakuyiwa, sha ikolela komwaalu gwaantu moshilongo, opo kehe gumwe a kale a kwatelwa mo,’’ ta fatulula ngaaka.
Omayalulo gaantu nomagumbo oga li ga tameke momasiku 18 gaSepetemba notaga ka hula momasiku 03 gaNovomba nuumvo.
Gumwe gomaanambelewa aakuluntu mehangano lyoCensus Sakaria Iipumbu okwa ti, nonando ya tseyithilwa omashongo ga yooloka, omayalulo otaga ende nawa.
“Aayaluli ngashiingeyi oye Ii molweetho olutitatu,” ta popi ngaaka.
Okwa ti, okwa inekela kutya omayalulo otaga ka pwa nawa ngele kape na omayimbo ge ya po.
Iipumbu okwa indile oshigwana shi longele kumwe naayaluli, omolwomauwanawa gomonakuyiwa.
“Shoka sha halika omwaalu gwaantu, opo ku longekidhwe onakuyiwa ya opalela omwaalu gwaantu ayehe ye li moshilongo,” ta fatulula ngaaka.
Ta ti aanambelewa yomayalulo oya pewa uuthemba wokupula uuyelele megumbo kehe.
“Aanambelewa mboka yomayalulo otaya vulu okugandja omageelo kwaamboka itaaya iyutha unene tuu mboka taya tindi oku ya pa uuyelele nenge taya tindi oku ya pitikila momahala nenge momagumbo gawo. Omageelo taga gandjwa ongaashi egeelo lyofuto yoshimaliwa sha adha sigo N$50 000, egeelo lyoomvula ntano mondholongo nenge ya pewe omageelo ngoka gaali oshita.” a popi ngaaka.
Ta tsikile kutya oshikondo sho-NSA otashi tsikile nokukala shi itula mo mokushilipaleka kutya oshilongo oshi na uuyelele wu li mondjila, wopethimbo nowu na ongushu.
vkaapanda@nepc.com.na