Uuministeli wuuhaku nonkalonawa owa lopota omwaalu gwaantu taya tuntilwa oshikando shotango tagu shonopala unene.
Otaku hokololwa kutya sigo oompaka oopelesenda dhaantu ya tuntilwa odhi li ashike 60.
Minista guuhaku nonkalonawa Kalumbi Shangula okwa ti, aantu ye thike po230 760 oya tuntilwa oshikando shotango omanga ye li 140 757 ya tuntilwa oshikando oshitiyali.
Ta ti, okuntilwa otaku dhana onkandangala onene oshowo otaku keelele omaso taga etithwa komukithi ngoka.
“Otandi tsikile okukumagidha nokutseyitha uuwanawa wokutuntilwa, kehe ngoka a tuntilwa, a mana ko omalweetho agehe gaali gowenda, ota henuka eso oshowo okukwatwa komukithi gwoCovid-19,” ta kumagidha ngaaka.
Ta popi ta ti, oya ndhindhilike kutya okutuntilwa oko oshilwitho shomukithi gwoCovid-19, onkene osho ashike shi na okulwithwa nasho opo omukithi nguka gu shonopale nenge gu hule po.
“Uudhigu womukithi nguka otwe wu mona, nongele otwa hala okugalukila konkalo twa li muyo nale, ongele tatu hogolola okutuntilwa atusheni,” ta popi ngaaka.
Shangula ta ti, omiti ndhoka kadhi na nando uuwinayi washa ngaashi omapopyo taga taambathanwa komalungula netompelo lyokuhongolola aantu kaaya tuntilwe.
“Ehogololo lyi li mondjila okutuntilwa, okugamena omwenyo gwoye, aapambele yoye oshowo mboka ho kala mekwatathano nayo,” ta popi ngaaka.
Ta ti, oshigwana ngele osha longele kumwe, ee tashi uvu ko shoka tashi kumagidhiwa nasho okuza kwaamboka ye na ontseyo, okulwitha omukithi nguka, nena Namibia otaka sinda oCovid-19 muule wethimbo efupi.
“Shoka sha simana okugwanitha po omalandulathano noompango tadhi zi koshikondo shuuhaku, ngele kehe gumwe okwa tuntilwa, ompito yokukwatwa komukithi gwoCovid-19 oya shonopola,” ta ti ngaaka.
Minista ta ti, oshigwana nashi itule mo mokutuntilwa, oshoka omukithi ngoka ngele tagu ponokele omuntu ihagu dhana, aanelago aashona haye gu sindi.
Ta gwedha po ta ti, omuntu oha yalulwa a tuntilwa uuna a mana ko omalweetho agehe gaali, ihe ngele okwa wendwa ashike oshikando shimwe, ita yalulwa onga a tuntilwa.
Minista okwa ti, nonando omwaalu gwaantu taya kwatwa komukithi gwocovid-19 nago ogwa shonopala, oshigwana nashi tsikile okugwanitha po omalandulathano agehe ga tulwa po, opo omukithi nguka gu hule po thiluthilu.