Oosikola ndatu moshikandjohogololo shaShikuku moshitopolwa shaMusati odha pata sho oondjila dhoku ya koosikola ndhoka dha tetwa ko komeya.
Omukuluntu gwelongo moshitopolwa shaMusati Benny Eiseb okwa patana kutya kashi shi shoshili kutya oosikola Petrus Nangolo Iilonga, Iitamaro Combined, oshowo Emvula Junior Secondary inadhi pata.
Aanona poosikola mpoka, aavali, aalongi yamwe oshowo omukuluntusikola gwosikola Iilonga Nangolo Petrus Combined, oshowo Kansela goshikandjohogololo shaShikuku oya koleke oosikola ndhoka kutya odha pata thiluthilu, omanga dhimwe dha pata ashike oongundu dhopetameko.
Aantu yamwe ohaya popi ashike okukakeka iitopolwa yaantu,” Eiseb ta popi ngaaka.
Omukuluntu gwosikola Petrus Nangolo Iilonga, John Sheyavali, okwa ti, osikola ye ayihe oya pata molwaashoka ondjila ndjoka yi na okweendwa oya teka po komeya oshowo iishana yimwe moka mu na oku enda aanasikola yu udha omeya.
“Iishana oyu udha omeya, aanona oye na oku enda iinano ya thika pookilometa omulongo ye li momeya, shoka sha nika oshiponga notashi vulu oku etela aanasikola,” ta fatulula ngaaka.
Ta gwedha po ta ti, oya tegelela omeya ga shune pevi kashona opo ya tale kutya otaya longo ngiini ya galukile kosikola.
“Otwa popya naanambelewa mendiki lyi na sha noopate, noya yamukula meendelelo kutya, otaya longo opate ndjoka ya teka po, opo aanona ya tsikile okuya koosikola,” ta popi ngaaka.
Kansela gwoshikandjohogololo shaShikuku Mathew Gabriel ngoka naye a koleke kutya oosikola ndhoka odha pata okwa ti, shoka sha patitha oosikola oopate ndhoka dha teka po sho dha hokwa komeya gomvula.
“Kandi na uuyelele awuhe, ashike onda kundana kutya aanambelewa yendiki lyoopate oya yamukula nawa,” ta popi ngaaka.
Kansela okwa gwedha po ta ti, oopate ndhoka ohadhi teka po shito komvula.
Omulongi gumwe ha longo muyimwe yoosikola ndhoka okwa ti oye li manga komagumbo ya tegelela omeya ga tye po hwepo opo ya shune koosikola.
“Osikola yetu oya pata ashike okuza poondondo dhopevi sigo opondondo ontine, oshoka odho dhi na aanona aashona unene itaaya vulu okutaaguluka omeya.
– vkaapanda@nepc.com.na