Charles Ndeumane
Uuministeli womudhingoloko, omithitu nomaendathano owa dhana esiku lyokukuna omiti muuyuni moshitopolwa shaHangwena moka wa gandja omiti dhi li 500 koosikola Hamano, mwa kwatelwa omiti dha pumba nodha gamenwa.
Esiku lyokukuna omiti muuyuni ohali dhimbulukiwa aluhe moshiwike shotango shaKotomba omumvo kehe, nonuumvo edhimbuluko pambelewa olya ningilwa mOshakati momasiku 11 Kotomba moka uumuti wu li 780 wokutsika wa topolelwa oondoolopa dhOshakati nOngwediva.
MEtiyali lyoshiwike shika uuministeli owa gandja iimeno yokutsika koosikola hamano moshitopolwa shaHangwena.
Esiku lyokukuna omiti moshitopolwa shaHangwena olya dhimbulukiwa pamuthika gwoshitopolwa posikola yaSakaria Nghikembua Primary. Oosikola oonkwawo ndhoka dha topolelwa omiti omwa kwatela Kambala Primary, Ongenga Private, oshowo Oshikunde Combined. Kansela gwoshikandjohogololo shaKongo Efraim Shipindo okwa ti uuministeli owa gandja omiti dha pumba dhoSalvador Pesca dhi li 4 ndhoka hadhi vulu okupanga omikithi mwa kwatelwa omukolo neshikisha.
“Oshikonga shokukuna omiti osha pumbwa okukuthwa ko neitulemo oshoka embugapalo out li weteni sho tali ende lyu uka komeho. Otatu ka mona ashike twa kanitha omaludhi gomiti dhimwe dhi na oshilonga,” Shipindo ta ti.
Omuwiliki gwoshikondo shomithitu muuministeli womidhingoloko, Johnson Ndokosho okwa ti esiku ndyoka ohali dhimbulukiwa opo aantu ya dhimbulukithwe okukuna omiti opo ya wapeke omidhingoloko dhawo osho wo okukwashilipaleka kutya omiti otadhi tsikile nokugandja omauwanawa kaantu.