OSHIKUKU-Yimwe yomoondjila onkulu mondoolopa yaShikuku, oya patululwa pambelewa mehuulilo shiwike komima sho ya tulwa oteya.
Ondjila ndyoka ya kala owala okapate komamanya uule wethimbo nongashingeyi oya tulwa oteya, oya kala noku longithwa unene koshigwana, sho tashiyi kongeleka yoRoman Catholic Mission oshowo koshipangelo shoka kwali tashi ithanwa St’ Martin, mOshikuku.
Mayola gwondoolopa yaShikuku Julia Endjambi, esiku ndyoka okwa popi kutya elelo lyondoolopa lyaShikuku onkene ta li tsikile okuhumitha komeho Oshikuku, opo wo lyi kale ponkatu mpoka pena oondolopa oonkwawo.
“Ondoolopa ngele oyi na oondjila dhili monkalo ombwaanawa, no tandhi longithwa koshigwana, shoka osho ehumokomeho,” ta popi ngaaka. Ta ti, elalakano okueta omayakulo po pepi noshigwana, oshowo okugwanitha po shoka sha pumbiwa koshigwana.
Endjambi okwa ti, elelo lyondoolopa lyawo ota li tsikile, okugwanithala po oshigwana kehe shoka yali yeshi uvanekele.
Omugandji gomauyelele melelo lyondoolopa lyaShikuku John Siloiso okwa ti, ondoolopa yawo otayi humukomeho kehesiku.
“Oyindji oya holoka mondoolopa yawo okuza omumvo gwayi no tayi tsikile okuholoka. Oshikuku ngaashingeyi oshina omayakulo ogendji ngele haagehe,” ta popi ngaaka.
Ta gwedha po ta ti, kehe shoka oshigwana shali sha uvanekelwa osha tulwa miilonga. Oyimwe po ashike inaayi manwa okulongwa omolwa omayimbo gontumba.
Siloiso ta ti, otaya tsikile okulonga nuundhiginini opo ondoolopa yawo yi thike ponkatu dhoondolopa onkawo moshilongo.
“Otuna ooproyeka ndhili metifa nodha tegelelwa okukala dha pwa methimbo efupi. Oproyeka dhoka natango okwa li dha gandja ompito yiilonga moshigwana,” ta popi ngaaka.
“Elelo lyoNdoolopa yaShikuku olya longa oshilonga oshinene noshiwanawa, otandi pandula aakomeho ayehe yondoolopa sho ya li ya longele kumwe, oku kandula po oompumbwe onene nelunduluko moonkalamwenyo dhoyendji tayaka longitha ondjila ndyoka,” omukalimo gomOshikuku Saima Shoolongo ta ti ngaaka.
Shoolongo okwa ti, shika otashi ulike nkene aaleli yondoolopa taya longo, nolukeno yena no noshigwana.
Ta ti oya ndhindhilike omahumo komeho ogendji ga holoka okuza omimvo dhayi, no ya tegelela ogendji ga holoke sigo omimvo ta keya. vkaapanda@nepc.com.na