Auleria Wakudumo
Omukulunhu wehangano hali andjaneke opendjela yovakulupe yedina Epupa konooli okwa holola kutya opendjela yovakulupe itai ka fika keenhele dimwe dokutambulila opendjela moshitukulwa shaKunene nomOshana molwomeva oo a ninga mahapu paife.
Gerhard Nautoro okwa ti opendjela oya kalekwa manga peenhele dimwe tai ka tameka okudja Etine molwoyeendifo itai dulu okufika keenhele oko shaashi oyana nomilonga oda yada omeva.
“Moshikandjohoololo shUuyundhiya moshitukulwa sha Shana omu na eenhele mbali, Oponona osho yo Nagendji gaKapolo. Molwoyana ihapu moshitukulwa shaShana oyo paife ya hada omeva, eetuwa dopeendjela ihadi fiki ko vali keenhele odo,” Nautoro ta ti.
Oitukulwa imwe, Nautoro okwa ti ovakulupe ohava ningi onghendabala opo va ye popepi neenhele di li popepi navo oko eetuwa dopendjela hadi xulile.
Moshitukulwa shaKunene namo omu na eenhele dimwe itadi kwata opendjela molwomeva. MoKunene omu na omilonga neenhele odo da shiya kofindo yomilonga ohadi kala inadi kwata ependjela pefimbo molwomeva.
“Eenhele itadi kwata opendjela molwomeva moKunene ongaashi Ondundaongonda nOkavare kaDe-Wet. Eenhele edi oda tongolwa ko komeva na kape na oshiendifo tashi dulu okutauluka omilonga,” Nautoro ta ti.
Nautoro okwa weda po ta ti koshitukulwa shaZambezi, Kavango East noKavango West nande ku na oshikungulu shomeva mahapu, ohava longifa eembautu okuya keenhele dopendjela opo va kwashilipaleke kutya ovakulupe ova mona okafilinga kavo kokulikwafa pefimbo eli.
“Ngeno okwa li hashi dulika, ngeno oumbautu ovo ashike tava longifwa peenhele adishe ashike ngaashi onghalo yomeva omomulonga nomoshana mu na oiti noifidi itashi dulika,” Nautoro ta ti.
Nautoro okwa ti ova taalela omashongo mahapu pefimbo eli lomeva. Okwa holola ta ti eetuwa davo ohadi uwa komalola mokushinga momeva naimwe oya kala itai dulu vali okulongifwa nokuli.
Eenhele dimwe odo da li inadi kwata opendjela molwomeva otadi ka kwata okudja mEtine va tengeneka kutya omeva otaa ka shuna ngaho pedu moshitukulwa shaShana.
“Posenda pOnamulunga, Oshaneko osho yo posenda pOshihenge ohatu ka kwatafana nookansela ava opo ve tu pe nande ovahongifikola ovo veshi po nawa ve tu kwatele komesho opo tu fike peesenda edi nokuyandja oshimaliwa shovakulunhu vetu,” Nautoro ta ti.
Nautoro okwa indila ovakulupe ve lididimike pefimbo eli lomeva manga okafilinga kavo take ya.
Okwa pula yo ovo tava dulu va ye peesenda dopopepi navo okukakwata opeendjela yavo.
“Ohandi indile yo ngeenge ope na eenhele odo inadi kwata opendjela molwomeva ndele ope na oundjila vomomapya opo va ninge ekwatafano nombelewa yetu tu dule okufika ko,” Nautoro ta ti.
-wakudumoauleria@gmail.com