Opolisi moshitopolwa shaZambezi oyi li molukongo lwomulumentu ngoka anuwa a dhenge noku ehamaka noonkondo omukiintu gwe noshinima inaashi shiwika, oshinima shoka sha fala sigo omeso.
Otaku hokololwa omukiintu ngoka a li a monithwa oshiponga muDesemba omumvo gwayi ashike okwa hulitha mehuulilo shiwike lyazi ko.
Sha ikolelela kepeko lyopolisi lyiiningwanima yomehuulilo shiwike, lya pitithwa komugandji gwomauyelele gopolisi moshilongo Kauna Shikwambi, oshiningwanima shoka osha holoka momukunda Singalamwe momundhingoloko Katima Mulilo.
Otaku hokololwa kutya nakusa Gertrude Muzimisa gomimvo 49 okwali a dhengwa komutse noshina inaashi shuwika shoka kwali she mu ehahameke nokufalwa kokapangelo kedhina Sesheke , no kwali a tuminwa koshipangelo oshinene shaKatima Mulilo.
Ta ti, hugunina okwali a tuminwa koshipangelo koWindhoek hoka ali a hulithile Etitano lya zi ko.
Opolisi oya ti, naku fekelwa natango keshiwike mpoka eli, no taya indile oshigwana shi longele kumwe no polisi okukonga omulumentu ngoka.
Kehe ngoka ena uuyelele kombinga yoshiningwanima shoka na lopotele opolisi yili popepi naye.
Shoka osha holoka ashike omasiku omashona sho okanona komimvo ntano kasi sho anuwa ka dhipagwa komusamane gwayina mOmbaye, moshitopolwa Erongo mEtitano lyazi ko.
Otaku hokololwa kutya omulumentu ngoka ngaashingeyi a mangwa po okwa kala ta hepeke omukiintu gwe noku muningila omatilitho uule womimvo dha piti.
Sha ikolela koshifokundaneki shaNew Era, okanona hoka okali ke li nomumwayinagona gwayina sho kiilwa po komulumentu ngoka, noku ke ka dhipaga.
‘’Onda kala nokukonga ekwatho kopolisi oshoka onda kala nale momahepeko, ihe opolisi inayi kwatha ndje. Okuza oshiwike sha zi ko onda kala nda thikamena oosasiona yopolisi mOmbaye ihe inandi kwathelwa,” yina ya nakusa ta hokolola ngaaka. Okwa hokolola kutya okuuvite kutya opolisi inayi longa sha gwana okugamena omwana naye mwene, oshoka ngeno okanona ke ina ka dhipagwa.
Nakusa okwa tseyika nedhina Wilfred Dantani Eiseb.
vkaapanda@nepc.com.na