OSHAKATI – Omukuluntu gwopolisi moshitopolwa shaShikoto Teopoline Kalompo-Nashikaku okwa ti otaya ka umba kolutu nokudhipaga aayikuthiliveta mEtosha.
Nashikaku ta ti ngele tashi ya kaafuthi mboka, opolisi itayi ka umba nande pomunkulo oshoka aantu mboka haya ningi uukongo waa shi wopaveta nayo oya nika oshiponga noonkalamwenyo dhaakeleli yiiyamakuti odhi li moshiponga, oshoka nayo otaye ya dhipaga.
Kalompo-Nashikaku okwa popi ngaaka oshiwike shika sho kwali kwa ningwa oshigongi naNgoloneya gwoshitopolwa shaShana, ookansela yiikandjohogololo ya yooloka aanambelwa oshowo aakalelipo okuza komalelo gopamuthigululwakalo oshowo komalelo gopandoolopa.
“Aantu mboka haya ikuthile ooveta okudhipaga iiyamakuti ya gamenwa ohaya kala ya homata, onkene itatu ka gandja ompito yokuumbathana nayo,” Kalompo-Nashikaku ta ti ngaaka.
Okwa tsikile kutya sho ya kala taya patolola mEtosha, oya ndhindhilike mo iipotha yedhipago lyoompanda yi li 30 omumvo nguka ashike.
Ta ti, aakeeleli yiiyamakuti oye shi pondola okudhitika aantu 42, noyi itsu momahinga goompanda ga thika po60 mEtosha.
“Otwa ndhindhilike wo kutya oyendji taya longo iilonga mbyoka ohaya pitile moshitopolwa shaShana, nuuna ya mana okulonga iilonga mbyoka ohaya ka holama koondoolopa ngaashi Oshakati, Ongwediva osho wo Ondangwa,” ta popi ngaaka.
Kalompo-Nashikaku okwa kumagidha aanafaalama ya dhingoloka Etosha opo ya longele kumwe nopolisi osho wo uuministeli okulopota iiningwanima inaayi uka tayi holoka mEtosha.
Omupevikuluntu mEtosha Naambo Iipinge okwa ti, mboka taya dhipaga oompanda ohaya tumwa kaantu.
“Etosha olyi na okugamenwa omolwongushu yuuyshitwe lyi na nongele uushitwe mboka owa hanagulwa po, otatu kanitha oshindji,” ta fatulula ngaaka.
Ta ti, aatalelipo ohaya hilwa unene koompanda oonduudhe noontokele oshowo uushitwe wu li mEtosha.
Ta fatulula kutya aatelelipo ohaya yambidhidha noshimaliwa shi thike poomilliona N$40 hayi yi moshiketha shepangelo.
Omupevi-kuluntu gwokiitopolwa yokonooli Rehabian Erkie okwa popi kutya oompanda ohadhi kwata oomvula omugoyi okukoka.
“Ngele otwe dhi dhipaga po otadhi ka za we peni ngele ohadhi kwata ethimbo alihe ndyoka okukoka, naatalelipo ohaya hilwa koompanda ndhoka,” ta nyenyeyta ngaaka. Kansela gwoshikandjohogololo Uukwiyuushona Andreas Amundjindi okwa ti, aakeeleli yiiyamakuti oye na mo sha medhipago lyiiyamakutti.
“Ongiini iiyamakuti tayi tsikile okudhipagwa omanga aanambelewa taya patolola, kokutya oyo haya gandja uuyelele kombinga hoka taya longele opo ya longe iilonga yawo nawa,” ta ti ngaaka.
Ta gwedha po kutya oshihwepo ngele aakeeleli taya kala ihaaya longo noongodhi dhawo dhopeke, yo taya pewa uuradio wokulonga nawo.