Maurice Kambukwe
WINDHOEK- Sha gwedhwa kombwena osha thika ngaa tuu shili, oomwedhi niiwike ya zi ko Namibia alihe olya kala lya ligamena kuudhano wa unganekwa kehangano lyomakwatathano gopaengodhi-MTC- moka lye yap o noprojeka tayi lalakanene okukandula po omahepeko gopaukashikekookantu, shoka tashi ka ningwa ngula kehala lyoWindhoek Country Club. Oprojeka ndjika ya-MTC oya nuninwa okugandja uuyelele kombinga yokukandula po omahepeko ga tsikwa kuukashikekookantu moNamibia. Oshituthi shika otashi ka nana aantu mboka ya tseyika nawa moka taya ka ninga ka tambula ka kwata ya kondjithe osho wo ya lungameke aantu kombinga yiinima yi na sha nomahepeko gopaukashikekookantu, omahepeko ngoka ge li natango eshongo enene moshilongo.
Mondambo kongulohi yOlyomakaya omu na omuhikingalo omusindani gomapapa KP Illest ngoka ta ka kuthathana po nomuwiliki gwooprograma koradio Paul Da Prince moshiviha shika shoJunior Middleweight.
Jossy Joss, omukuluntu gworadio Eagle FM ota ka ikwata nomunangeshefa osho wo kaputaina omukulu gwoCivics Amos Shiyuka moshiviha shoHeavyweight.
Moshiviha shoCruiserweight otamu ka tya pwaka sho omuhikingalo gwoongalo dhopambepo D-Naff taya ka taalelathana naAmos Kambonde a za ko-GIPF. Oshiviha shoSupermiddle otashi ka wayuka po naDJ Cheese gwokoFresh FM nenge nomuhikingalo Sunny Boy.
Omakondombolo onkene taga ka tsikila okulya ehete moshiviha shoJunior middleweight sho Job Amupanda, ngoka a tseyika nawa ihaa thigi emanya lya londa kekwawo ngele tashi ya kiikwapolitika, ta ka tsakanena nomunangeshefa Johnny Johnson Doeseb, omanga Mappz Kapofi taya ka pa uuhandja naMufaro Nesongano gwehangano lyo-NWR.
Omukuluntu gwoMikel Jes Michael Vermeulen ota ka taalela Tate Buti.
Uudhanom mbuka owa kwashilipalekwa komahangano gatatu-MTC, MVA osho woNWR.