Omaudhano gomahangano ga yama kepangelo taga ithanwa State- Owned Enterprise (SOE) Games otaga tameke nena taga ningilwa koSwakomund koshitopolwa Erongo.
Omahangano ge li 53, ga thikama po maaniilonga ya pita 300 otaga kutha ombinga momaudhano ngoka. Omaudhano ngoka oga dhanenwe oshikando shotango momumvo 2016 noga etwa po nelalakano okukaleka po uukumwe pokati koo-SOEs.
Aaniilonga ya za komahangano ngoka otaya kutha ombinga momaludhi gomaudhano ga yooloka ngoka ga kwatela mo etanga lyokoompadhi, etanga lyomokambamba, ekondjelo lyongodhi ku talike ngoka e na oonkondo, okumatuka o4x100m kwaakiintu naalumentu , nokwoshinano shookilometa 10, nokatanga komonete kovoli.
Omaudhano ngoka taga tameke nena omasiku 24 gaJuli otaga yi sigo omomasiku 27 Juni.
Omunashipundi gwomaudhano ngoka Albert Kevare, okwa ti omaudhano onkene taga tsikile okukoka, nokwanyanyukwa oshoka aakuthimbinga otaya ulike ya ilongekidha.
Ta gwedha ko kutya okweeta oo- SOE pamwe okwo okunyanyukilwa pamwe nokutseyathana osho wo okunkondopeka uukumwe, nonando elalakano lyimwe okudhana omaudhano ga yooloka.
“Omalongekidho oge li metifa, ayihe oyina okweenda nawa. Otatu kala tuna egameno lya kwata miiti okuyanda iinima inayi uka yi holoke,” ta ti ngaaka.
Omaudhano ngoka taga ningwa oshikando oshi-10 ngaashi ngeyi, omumvo gwa zi ko oga ningilwa kOshakati.
Omumvo gwa zi ko Kevare okwa li a fatulula kutya oya li ya hogolola Oshakati oshoka okapale kOshakati Independence Stadium oke li pamuthika gwoku ningilwa omaundhano ngaka.
“Monakuziwa otwa li twi iyadha tu na omashongo ge na sha nomahala gok ningila omaudhano ngoka, shoka olwindji hashi eta opo kaatu mane pethimbo, ashike nuumvo otu na omukumo kutya otatu ka mana nawa, molwaashoka okapale hoka taka dhanenwa oke na uupale wetanga lyomokambamba notatu vulu wo okudhana omaudhano galwe g iili pokapale opo tuu mpoka,” Kevare ta ti ngaaka.
Kevare okwa gwedha po kutya omaudhano oge lile po owala okwiiyuvitha nawa, aasindani otaya ka pewa omapapa nomakopi, taga ka pewa omahangano ngoka ge shi enditha nawa.
-vkaapanda@nepc.com.na