Victoria Kaapanda

ONGWEDIVA-Omulumentu gwomimvo 33 taku fekelwa kutya ke li nawa momutse okwa mangwa po Osoondaha, sho anuwa a dhipaga okanona komumwayina nomupini.

Omugandjimulombo nomugandji gomawuyelele moshitopolwa shaHangwena Warrant Abner Kaume Itumba okwati oshiningwanima shoka osha li sha holoka potundi 09h00 yongula, momukunda Ohepa moshitopolwa shaHangwena.

Itumba okwati okwa lopotwa kutya, aanona yeli yaali okwali taya tsu poshini, mpoka yali ya ponokelelwa komulumentu ngoka. Aniwa okwali tango a hala oku dhenga okanona komwayinakadhona hoka kali ka mono ompito yokumatuka po.

“Okanona hoka kali ka thigala po okwe ka ponokele nomupini nokukadhenga shinyanyaleka sigo omeso. Omumwayinakadhona ngoka a li te ya andola a popile aanona, naye okwali a ponokelwa nomupini ashike ye okwa matuka po, omanga iinaa mona oshiponga,” Itumba ta ti ngaaka.

Gumwe pambele yomufekelwa ngoka, okwali a lombwele Kundana ta ti, omulumentu ngoka okwa kala nuumvu wopamadhiladhilo, ashike ina kala nando omukolokohi.

Ta hokololola omumati ngoka okwali okanona ke na omagano moskola, nokali ka pita nootsa iiwanawa moGrade 10.  Ashike andola a ka tsikila Ondondo onti-11 kosikola kOmwadikange Kaulinge uuvu womadhiladhilo owa tameke.

Okanona hoka kahulitha oka tseyika nedhina Eveline Iipitwa Naundobe gwomimvo 11.
Itumba ta ti opolisi kayi koleka natango ngele omulumentu ngoka okuna uuvu womadhiladhilo shili. Omakonakono gopolisi ogeli ota ga tsikile, no ta holoka mompangu nena.