ONGWEDIVA - Elelo lopamufyuululwakala laUkwanyama ola tameka oilonga yeemhangu dopamufyuululwakalo konima eshi kwa li la ya mokafudo.

Elenga la kula loshikandjo shEenhana Efraim Weyulu okwa koleka ta ti elelo okwa li la tula oihokolola pokafimbo molwoshikakofimbo shomaongo.

Omalelo opamufyuululwakalo Ovawambo aeshe ohaa pate eemhangulilo dao pamufyuululwakalo, hano pefimbo leemwedi dovanhu tava nu omaongo, ihaku kala ku na oihokolola. 

Weyulu okwa ti osha fimana opo omhangu i kale ya ya mokafudo pefimbo lomaongo opo ku kelelwe ovanhu tave lipumu mumwe.

“Otwa didilika ovanhu vamwe hava holoka komhangu va nwa omaongo. Naashi ohashi eta opo ovanhu va kale vehe li uditafane,” ta ti.

Okwa ti omhangu yopamufyuululwakalo oye li longekida okukala ya yandja omayakulo koshiwana moipambele yopaveta.

Weyulu okwa yelifa ta ti omhangu yopamufyuululwakalo ohai ungaunga noibofa ya yooloka mwa kwatelwa ovanhu tava tuku vakwao.

“Ovanhu aveshe ohava yakulwa shi fike pamwe komhangu pehe na omunhu ta ningwa okatongo. Onghee oshiwana nashi manguluke okushangifa oibofa yavo komhangu yopamufyuululwakalo,” Weyulu ta ti.

Okwa hokolola ta ti omhangu yopamufyuululwakalo nayo oi na omilandu ngaashi naanaa odo di li komhangu yoshinanena.

“Otwa didilika ovanhu vamwe itave liufa komilandu da tulwa po komhangu,” ta ti.

Okwa yelifa ta ti omhangu otai twikile okuyandja omahandukilo opaveta kovanhu ovo itave liufa komilandu.

“Omunhu ou ta ka dopa okuholoka komanhu ngeenge ta ufanwa koihokolola ota ka pewa ehandukilo a fute oshimaliwa shonhumba,” ta ti.

Okwa weda po ta ti omhangu yopamufyuululwakalo oya taalela yoo vali omashongo ovanhu tava shangifa oibofa ashike itava holoka ngeenge tava ufanwa komhangu.

Weyulu okwa ti oibofa youmbudi yoimuna noshoyo yovalumenhu ina va hala okufuta oukadona ngeenge ve vatokola ondjeva oyo imwe hai lopotwa unene.

Okwa kumaida oshiwana shi longele kumwe nomhangu yopamufyuululwakalo.

-fhamalwa@nepc.com.na