Omukainhu weedula 40 okwa kwatwa po konima eshi vati a dipaa omulumenhu waye nombele pefimbo kwa li tava kondjele oikulya meumbo lavo.

Oshiningwanima osha ningwa mexuliloshivike kolukanda Nau-Aib modoolopa yaKahandja.

Nakufya okwa tongololwa oye Sebedeus Davis weedula 34 omukalimo womOkahandja.

Omupopiliko wopolifi omupedu Commissioner Kauna Shikwambi okwa hokolola ta ti omulumenhu ou okwa tameka okupula nekulu laye oikulya pefimbo ovaholafani ava ova dja keendingosho efimbo loufiku.

Okudja opo ova tameka okutanguna naashi vati osha eta opo Davis a nyekule ko oluko komukainhu waye oo a li ta telekifa ndele te li mu dengifa.

Omukainhu vati okwa vakula ombele nokutwa Davis monhulo. Davis okwe lidenga po nokonima okwa xulifa meumbo lavo. 

Opolifi oya hokolola tai ti omufekelwa okwe litwala ye mwene kopolifi konima yoshimbuluma eshi.

Ota pangulilwa oshibofa shedipao nomakonakono opolifi otaa twikile.

Oshiningwanima shikwao, omulumenhu weedula 28 okwa xulifa konima eshi a tuwa nombele mexuliloshivike molukanda Okahandja Park moWindhoek efimbo loufiku.

Nakufya okwa tongololwa oye Randjiph Vries omukalimo womoWindhoek.

Omufekelwa weedula 23 okwa kwatwa po nomakonakono opolifi otaa twikile.-fhamalwa@nepc.com.na