Festus Hamalwa

Omukainhu weedula 57, okwa pya nokufya eshi kwa li ta teleke meumbo laye efimbo longula momukunda Epoko, moshitukulwa shaMusati.

Omukwatakanifi womakonaakono oimbuluma Titus Shikongo okwa hokolola ta ti Christiana Shikokola okwa li ta teleke melimba kefiya loshinanena loshimoko (ohaasha),mupya munene ohaasa oya topa noku eta oshiponga. Shikokola okwa mona oshiponga neenghono unene molutu nomoshipala.

Shikongo ta ti omukainhu ou okwa twalwa koshipangelo shepangelo kOutapi, nokonima okwa tuminwa koshipangelo sha kula shaShakati oko a ka xulifila. Ovakwapata vaye ova shiivifilwa efyo eli.

Kakele koshiponga shomundilo moshitukulwa shaMusati omwa lopotwa vali efyo lomukulupe weedula 84, Namashana Gabriel Iita ou a fya eshi e limangeleka koshi yomuti Etivali momukunda Elyalyatika, moshikandjohoololo Ogongo.

Opolifi oya koleka kutya olutu lanakufya ola monika kumukulukadi waye oo a hanga e li meemango a fya. 

Nakufya ina fiya po nande omukanda washa ou tau ndjandjkununa osheetifi shefyo laye. Olutu lanakufya ola twalwa kokila yopolifi koKahao. Omakonaakono opolifi otaa twikile.