Ina yomunadolongo wokOhangwena oo vati dengwa nokumonifwa oshiponga neenghono kovanadolongo vakwao ota ti opolifi nai popye oshili shaashi omona ina dengelwa modolongo.
Petrus Hauwanga weedula 34 okwa li e lihanga meembete, a teka eemhati, a mona oshiponga kofingo, e na eembole ye okwa tetwa noumbi komaulu, vati sha ningwa pefimbo lolwoodi olo la tukuka modolongo.
Oshiningwanima osha ningwa koshitaashi shopolifi shokOhangwena omwedi wa dja ko.
Kristofina Hedimbi, ina yaHauwanga okwa hokolola ta ti odo da popiwa kopolifi kutya omonamati okwa dengelwa moukololo vovanadolongo kadi shi doshili, shaashi omona okwe mu hokololela kutya okwa monifilwa oshiponga mombelewa, komesho yovanambelewa vopolifi.
Okwa ti pefimbo Hauwanga a tambulilwa moshipangelo okwa popya ta ti okwa dengwa kovanadolongo vahamano ndele kave shi vavali ngaashi opolifi ya hokolola.
“Ouyelele wa yandjwa kopolifi owa puka
molwaashi itau tu kumwe nouyelele ou twa pewa kuPetrus,” ta ti.
Mehokololo laHauwanga olo la kwatwa mokaaudio kuumwe womovakwapata laye, omananafano oo okwa tameka eshi vamwe vomovanadolongo ve mu twa noshiti pomatako pefimbo lokulya.
“Veti e shi e mu pula kutya okwe mu twike shike, omunadolongo oo okwe mu nyamukula kutya oku na omushila,” ina ta ti.
Osho osha eta eenhangu, fiyo Hauwanga ta ka lopotela opolifi kutya ope na ovanadolongo ve na oiketanga hava tula mo ovalumenhu vakwao vo tava i navo moixulo keenghono.
Hedimbi okwa hokolola ta ti konima yefimbo omupolifi umwe okwe va ila mo modolongo, vati nava ye kombelewa yaye opo ve ke lipe ombili.
“Eshi twe ya mombelewa omo, ovanhu (ovanadolongo ve li omuwoyi) vokosela ikwao omo nale twe va hanga mombelewa. Fye (vane) vokosela yetu, otwa hadwa. Konima yokuhadwa taku tiwa nee natu ye kosaala yovakonaakoni voibofa,” Hauwanga ta hokolola mokaaudio.
“Mosaala omo otwa hanga mo ovakonaakoni ve li omutumba poitaafula yavo, ve lipyakidila, ashike mboli omu na nale kamatyona umwe (omunadolongo) e li konima yomuvelo… Eshi ashike nda ka pita, onda dengwa ongonyo yomolupanda… umwe okwa kufa ombele ngeno a twe nge mofingo, onde mu kelela. Onda ka kendabala ndi faduke po, ndele eshi ashike handi piti oshivelo onda dengwa oshitenda shomomupolo. Kamatyona ou wombele natango okwe ya, ome ondi mu kwete ame handi mu denge neengonyo, ohaluka onda dengwa oshipilangi shomomutwe. Onda kwata umwe womuvo oye nda hondama konima yaye voo tava denge ombinga imwe. Efimbo olo ovapolifi novanadolongo ava twe ya mo navo mombelewa ova faduka po. Moikeleketa omo onda ka dengwa noshiti shokuleka omalapi opomakende momutwe. Onda ka ya nee koshi yoshitaafula ashike efimbo olo umwe ota teta nge nokambi komaulu, mukwao ta denge nge nokuulu koshipundi sho osho sha teya nge eemhati. Umwe te ya ta tunge nombele mepepe, efimbo olo kandi na nee vali eenghono… Efimbo alishe ope na kamatyona umwe womupolifi a hala okukwafela nge ashike okwa tila. Ovapolifi vakwao otava talele ashike momakende va mwena.
“Konima yefimbo onda ka ya pondje, kamatyona (omupolifi) oo ta lombwele nge kutya nandi hondame koshi yotuwa, oko nda xupila oko,” Hauwanga ta hokolola.
Eshi a kwatafana naKundana omukulunhu koshikondo shokukonakona oimbuluma shopolisi moshitukulwa shaHangwena omupedukomufala Zachariah Amakali okwa hokolola ta ti ombelewa yaye oye lipyakidila nokuninga omakonakono kombinga yoshikumungu eshi.
“Onda pewa ouyelele keembinga odo da mona Hauwanga eshi ta dengwa novanambelewa vopolifi ovo va li moilonga efiku olo ova pa nge ouyelele,” ta ti.