New Era Newspaper

Tafel3
Icon Collap
...
Home / Aashakati oya ikwata efundja

Aashakati oya ikwata efundja

2021-03-26  Festus Hamalwa

Aashakati oya ikwata efundja
Top of a Page

Victoria kaapanda

Omvula oya ningi omasiku tayi loko nawa miitopolwa oyindji yokonooli. Ashike oya limbilike aakalimo yomOshakati naakalimo yomomikunda dha dhingilila ondoolopa ndjoka, sho omeya taga ende taga ningi ogendji, taya ti efundja.

Matias Timoteus gwomomukunda Othingo, muuninginino wOshakati okwa ti, omvula oya ningi oshiwike tayi loko kaayi na oluthuwo, omeya oga ningi ogendji nomapya gawo otaga ende taga yulu komvula.

“Ondi wete kutya efundja olyi li mondjila, oshoka omvula oya ningi omasiku gaali inaayi loka  ihe omeya mpoka kwa li twe ga thigi hapo we ge li nena, nonando oya tsikile okuloka okupendukila ohela,” Timoteus a popi ngaaka.

Ta ti, otwa kala nokugalikana omvula yi loke shili, ihe oya ninga oyindji unene. 

Ta ti, otayi yonagula po iilya yawo, mbyoka kayi na nale oonkondo sho ya ningi ethimbo tayi pi komutenya yo itaayi lokwa.

Sheetekela Iyambo gwomolukanda Evululuko okwa ti, ombashu ye oyi li kohi yomeya.

“Kandi na nkene, otandi yi peni ngele onda yi ndi ka ze kookuume kandje, iinima yandje otandi adha ya yakwa mo koombudhi. Kandi na oshimaliwa sha gwana okututila pehala lyandje omavi, opo omeya kaage ye po,” ta ti ngaaka.

Ta gwedha po ta ti, omeya ngoka ogomvula ashike, nena efundja ndyoka tali popiwa lya fa tali endele ko olya thiki, itatu si ngaa omeya nani? ta pula ngaaka.

Iyambo okwa ti, osikopa ye yiikutu oya nyanyuka po thiluthilu komeya, omanga iinima yimwe e yi londeka kiipakete yoombiila opo kaayi nyenge omeya.

Omvula oya li ya loko unene okuza oshiwike sha zi ko notayi tsikile natango okuloka.

Iishana oya udha omeya niimuna oya paluka nawa komalutu sho tayi li omwiidhi gwa talala nawa.

Sha ikwatelela konkalo yombepo, omvula onene oya tengenekwa tayi tsikile okuloka miitopolwa yomonooli.


2021-03-26  Festus Hamalwa

Share on social media
Bottom of a page