Charles Ndeumane

Ongundu tayi pangele moSouth Africa oANC oya adha etsokumwe nongundu yompilameno yoDA opo dhi ninge omapangelo gadho limwe, shoka Aasouth Africa oyendji ye wete ta shi ka kwathela oshilongo.

Ongundu tayi pangele moSouth Africa oANC (African National Congress) oya tula epangelo lyayo mumwe nongundu yompilameno yoDA (Democratic Alliance) sha landula sho inaa yi shi pondola oku vena po omahogololo gopaupelestende ngoka ga ningwa moshilongo omwadhi gwa ziko. Shika osho oshikando shotango ongundu yoANC ta yi ndopa oku vena po omahogololo kohi yomupelestende Cyril Ramaphosa. Aakalimo oyendji yo moSouth Africa oye wete kutya nonande ita shi ka kala oshipu koongundu ndhoka oku longela kumwe, ota shi ka hanganitha Aasouth Africa noku kutha po ombepo yuukwamuhoko moshilongo. 

“Sho ta tu longeni onga oongundu dhopolitika opo tu tsakanekathaneni ondjilakati, natu ulikeni miilonga yetu nomopopyo getweni kutya otwa simaneka ekotampango noveta yoshilingo shetu, ngashingeyi ethimbo lyo ku tula omayooloko getweni poluha, opo tu hanganeni tu longeleni uuwanawa waayehe,” osho Ramaphosa a popi ngaaka. Moomvula dha piti ongundu yoDA okwa li ya talika ko kaaluudhe oyendji moSouth Africa onga ongundu yaakolonyeki oshoka aakwateli komeho oyendji yongundu ndjoka iilumbu. Konima yoomvula odhindji sho ongundu tayi pangele ya kala noku nyenyetwa kaakwashigwa yaSouth Africa molwa oku longa nuulingilingi unene tuu kohi yomupelestende omukulu Jacob Zuma oshowo omupelestende ngoka eli ko ngashingeyi Cyril Ramaphosa, Aasouth Africa oyendji oye wete kutya elongelo kumwe lyoongundu ndhoka mbali ota li ka ukililitha mpoka pwa bombonyonwa koANC.

Omutseyiveta gwaSouth Africa Tendai Mbanje okwa ti epangelo lyoANC noDA ota li hwahwameke uukumwe pokati kaaluudhe naatiligane moshilongo. “Ehangano lyoongundu ndhika mbali ota li yambula po onkalo yomahupilo oshowo eliko lyoshilongo,” osho Manje a stikile ko.

– mrndeumaneraycharles@gmail.com