ONAMINDA – ‘Otwa ninga oshivike ashishe inatu lya. Nena onda enda momaumbo 10 momukunda wetu, handi ehela
oufila tuka lye nounona vange, ashike ina mona ekwafo la sha’.
Aa omatumbulo aAnna Hamunyela ina nomutekuli wounona vahetatu, pomukunda Onamhinda u li popepi nOshikango moshitukulwa shaHangwena.
Hamunyela oku li umwe wovakalimo vomoshitukulwa hoololo shaShikango ovo tava xupu shokadila molwa ondjala.
Pefimbo Kundana a talela po omaumbo a yooloka oshivike sha djako, okwa shakeneka Hamunyela ta ende nomaumbo ta kongo oufila.
Efiku olo okwa shuna keumbo ina mona ekwafo la sha.
Olopota yaningwa kehangano loikulya mounyuni oWorld food program, oshivike shadja ko otai holola kutya Ovanamibia veli 376 000, ove li momhumbwe yoikulya. Oya hokolola yoo kutya ovanhu veli 6000 vomwaavo ove li momhumbwe yamemememe, oyo nokuli ya kwatela mo ovo ve li moipangelo omolwa omukifi wondjala.
Omukainhu ou a li ta hale oku lila eshi ta hokolola onghalo yeumbo laye okwa hokolola ta ti ova ninga oule woshivike ina va lya molwashi oufila woshikukuta o uva li va pewa kepangelo owa pwa po. “Ohandi ende nomaumbo handi kongo ekwafo loufila. Ounona vange otava kwena ondjala efimbo keshe. Ovanhu kave nasha oikulya momaumbo avo, sho osho itava dulu oku kwafela nge. Kape na ashike apa handi mono omakwafo oikulya,” ta ti.
Ovakwashiwana poshitukulwa opo vahapu otava lili ondjala molwonghalo yoshikukuta oyo ya kumwa oitukukulwa ya yooloka moshilongo.
Vamwe vomovakalimo mOnaminda ova hokolola tava ti neudo momapya avo ina mu dja nande omuma imwe yoshilya.
Omunamukunda mukwao Ndamonanghenda Ambolo okwa ta ti neudo okwa li a pululifa epya laye la pwako ashike ina mu dja sha.
Ambolo okwa ti pamwe novaneumbo vaye ve li vatanho ohava xupu ashike moikulya yoshikukuta oyo hai yandjwa kepangelo.
“Ngeenge ina tu pewa oikulya kepangelo otuna ashike okunangela ondjala. Nokuli eshi handi popi ngaha oikulya oyo twa pewa kepangelo oya pwa mo,” ta hokolola.
Okwa ti okwa pandula ombelewa yakansela wavo yoshikandjohoololo shaShikango eshi tai twikile nokuyandja oikulya koshiwana.
Elise Mungolo ta tekula ounona 15 okwa hokolola ta ti naye mepya laye ina teya mo sha neudo. “Ngeenge oufila woshikukuta owa pupo ohatu xupu ashike momatanga,” ta ti.
Okwa ti meumbo lavo iha mu dungwa oshikundu molwashi ka pena omahangu.
Ngoloneya woshitukulwa shaHangwena Sebastian Ndeitunga oshivike sha djako okwa popya ta ti mOhangwena omu na omaumbo 40 000 a pumbwa oikulya.