Omukainhu weedula 41 oku li moshipangelo shaShakati, e li monghalo itai nuwa omeva, eshi vati a tetaulwa nomakatana komulumenhu waye oo e ke limangeleka konima yokulonga oilonga ei ikukutu.
Oshiningwanima eshi osha ningwa Etitatu komukunda Ongongolwa moshikandjohoololo Tsandi moshitukulwa shaMusati efimbo lokomatango lwopotundi 18h30.
Nakufya okwa tongololwa oye Paulus Kathindi weedula 54 omukalimo womomukunda Ongongolwa.
Omupopiliko wopolifi moshitukulwa shaMusati Inspekta Anna Kunga okwa hokolola ta ti ovaholafani ava okwa li tava tanguna efimbo keumbo lavo.
Otaku hokolwa kutya omukainhu ou okwa tetwa komutwe nokofingo. Opolifi oya hokololwa tai ti efiku tuu olo lwopotundi 20h20 olutu laKathindi ole ke lituwa li li meemhango, monduda yaye yokunangala.
Ina fiya po omukanda tau yandje ouyelele kutya omolwashike e limangeleka.
Nakuninga oshihakanwa oku li monghalo ii.
Omakonakono opolifi otaa twikile moshikumungu eshi. Opolifi oya kumaida ovaholafani tava ningilwa omahepeko opo va lopotele opolifi pefimbo.