Victoria Kaapanda

Ongwediva  - Ehangano lyomapungulilo goonkuluhedhi lyedhina Museums Association of Namibia melongelokumwe nosheendo tashi zi kongongahangano yiigwana yaEurope  moNamibia osho wo National Museum yaFinland otaya ka patulula omaulikilo ngoka taga ka endaenda nomahala osho wo okaatoloko komauyelele momasiku 15 Apilili omumvo nguka. Epatululo ndika otali ka ningwa potundi 11 yongula pOsekundosikola yaNehale ndjoka yi li moshikandjohogololo Onayena moshitopolwa shaShikoto.

Omaulikilo ngaka taga ithanwa Oombale dhi ihaka otaga ka kala ge na iinima oyindji mbyoka tayi ulike oonkuluhedhi dhAandonga ndhoka  tadhi ka za kompungulilo yoonkuluhedhi yaRautenen ndjoka yi li koFinland. Omupevipresidente, Nangolo Mbumba oye ta ka egulula omaulikilo ngaka.

Omunambelewa mehangano lyoMuseum Association of Namibia Ndapewoshali Ndahafa Ashipala okwa ti shika oshinima inaashi ningwa nale kehangano lyawo notashi ka kala shi na ondjundo lela.
“Omauliko ngaka ogi ikolelela  kiilongomwa mbyoka ya li ya gongelwa komutumwa Omusoomi Marten Rautenen ‘Nakambale’ pwa pita ngashingeyi oomvula omathele notayi gandja ontalelo yi ili yomuthigululwakalo gwOshilongo shaNdonga.” Ashipala ta ti.

Ta ti iitopolwa yimwe yiilongomwa otayi ka endela pamwe nondjokonona yopakana ndjoka ya li ya gongelwa nokupungulwa mooomvula dho1930, ndjoka tayi hokolola ondjokonona yaakwaniilwa osho wo uuyelele wa simana kombinga yomahala mpoka pwa fumvikwa aaleli yotango yoshitunda Ondonga.

Omaulikilo ngaka nokaatoloko oga kwatela mo ehokololo lyemanya lyoshilongo shaNdonga, ndyoka lya li wo lya adhika moNational Museum yaFinaland. Oosekendele mOndangwa nOniipa otadhi kumikwa dhi yaleke omahala gadho opo aalongwa ya ka teke mo oshindji posikola yaNorthcote moshiwike shomasiku 27-31 Mai. 
Kuuyelele wa gwedhwa po kwatathana nameme Ashipala konomola yongodhi: 061 302230; E-maila: museums@iway.na