ONGWEDIVA - Ovapolifi tava longele peinda lopOnhuno moshitukulwa shaHangwena, itava kala vali ve li momutenya ile tava lokwa kodula shaashi paife otava tungilwa etala lomudile li li pamufika woshinanena.
Edi oda kolekwa komukulunhu wopolifi moshitukulwa shaHangwena Commissioner Ottilie Kashuupulwa, ta ti etala ola tamekwa okutungwa notali ka pwa momwedi tau ya.
Okwa yelifa ta ti etala ota li tungwa koshimaliwa sha dja kouministeli woikwameni, omataulukilo okeengamba neameno.
“Otwa didilika ovapolifi vetu tava mono oixuna yokukala ofika efimbo lile momutenya omanga pefimbo lodula ovapolifi ohava kala tava lokwa ngeenge ve li moilonga,” ta ti.
Onghee okwa ti ombelewa yaye otai lalakanene onghalonawa yovanambelewa vopolifi nokukwashipaleka kutya ovapolifi otava longele pomudingonoko uli nawa notau pitike ovapolifi va longe noupu.
Okwa weda po ta ti einda lopolifi li li mondjila yokudja mEenhana ya uka kOkongo nalo ota li ka tulwa etala lomudile opo ova polifi va longe noupu.
Kashuupulwa okwa ti ngeenge odula tai loko ovanhu ohava kala ve na omhito yokupitifa oinima ngaashi omandini omahooli nosho tuu molwashi ovapolifi ohava kala ve li mokambelewa va haama odula.
“Ohatu lalakanene ovapolifi vetu va longe noupu, okulonga noudjungu nokukwashipaleka kutya oimbuluma otai kandekwa moshitukulwa,” Kashuupulwa ta ti.
Okwa hokolola ta ti osha nyika oshiponga ngeenge omunhu e li momutenya efimbo lile unene tuu omunhu ngeenge e na oudu wonhumba.
“Ina ndi hala okuunda ta ku tiwa peinda lopolifi pa pitifwa otuwa ya umbata oinima ngaashi omandini omahooli ile oinima oyo ina i pitikwa molwashi pe na etomeno kutya odula okwa li tai loko. Onghee ovapolifi nava kwashipaleke kutya otava longo efimbo keshe ve li momudile metala tava ningi omapekapeko oinima ya holekwa meetuwa,” ta ti.
Okwa kumaida oshiwana opo shi twikile okulongela kumwe nopolifi okuyadja ouyelele kopolifi kombinga yoimbuluma tai ningwa momidingonoko davo.