Charles Ndeumane

ONGWEDIVA – Eshina lyokolutenda lya tumwa oku za posasiyona yeshina mOndangwa lya thinda kuushimba olya galukile posasasiyona ndjoka kaa mu na nenge omuntu gumwe konima sho kwa li lya tekele mondjila.

Omukuluntu gwosasiona yeshina yaNdangwa okwa tindi oku tya ko sha koshiningwanima shika. Ashikre pahokololo lyomuniilonga gwaTransnamib ngoka edhina lye itaa li vulu oku tumbulwa, eshina olya tumwa mEtitano lwopombali yokoongulasha oku za mOndangwa lyuuka kuushimba, ashike oku thika mOshomeya olya teka ombaadhilila nolya kankama. Aaniilonga ya adhika meshina pethimbo mpoka oya zi mo opo ya ka tale kutya uupyakadhi owa li peni, yo ye li pangele ya tsikile nondjila. Omuhingi gweshina naye okwa zi mo a ka pangele, ashike anuwa okwa thigi eshina mongela yo ku shuna monima shaa shi oshiningilawina.  Manga kwa li yiipyakidhila no ku pangela, eshina olya kala nawa, nolya tameke oku matuka ta li shuna monima oshoka omuhingi okwe li thigi mongela yo ku shuna monima. Momutumba anuwa olya zi mo ta li endelele onkene aaniilonga ina ya vula we oku londa. Olya shuna ngaaka nondjila ndjoka lya zi.

Aaniilonga oya dhengele kosasiyona yeshina kOndangwa opo ya gandje elondodho kutya eshina oko lyuuka hoka lyaa na omuhingi. Omukuluntu gwosasiyona mokuuva ndhika okwa tameke nomalongekidho go ku kankameka eshina uuna lya thiki posasiyona. Aanongo yomashina posasiyona yeshina yaNdangwa oye shi pondola oku li gwitha ko kolutenda opo ya shonopeke oshiponga. 

Moshiningwanima moka ina mu ehamekwalwa nande omuntu, ashike eshina niikoto yalyo yi li 26 oya mona oshiponga no ita yi ka longithwa mule wethimbo ele. Ondjila yolutenda ndjoka yo ku ya posasiona yeshina yaNdangwa nayo oya mona oshiponga, shoka ta shi ka kotha ehangano oshimaliwa oshindji oku yi pangelitha.

– mrndeumaneraycharles@gmail.com