Aalongi ayehe moshilongo otaya tyapula esiku lyawo nena. Esiku ndyoka ohali dhimbulukiwa momasiku 05 gaKotomba omumvo kehe, nohali tyapulwa moshilongo ashihe.

Momushangwa gwa pit ithwa kehangano lyoNamibia National Teachers Union (NANTU), esiku ndika otali dhimbulukiwa nena kOutapi moshitopolwa shaMusati. “Es iku ndika olya kala hal i dhimbulukiwa aluhe okuza momumvo 1994, mekwatelokomeho lyehangano Unesco,” omushangwa tagu ti ngaaka. Oya shanga kutya, esiku ndika otali ka tyapulwa kaalongi ayehe moshilongo oku ya pa ompito okusimaneka esiku lyawo.

Uuministeli welongo owa tseyithile oosikola kutya otadhi ka pata okuza nena, tadhi ka patuluka momasiku 9 gaKotomba nuumvo. “Okafudho hoka komasiku ngoka, oka nuninwa aalongi opamwe naalongwa yawo, onkene omasiku ngoka otaya ka kalekwa komagumbo,” uuministeli wa fatulula ngaaka. Shoka okwa li sha ningwa nelalakano lyokukongela aalongi omayambidhidho nokushilipaleka kutya aalongi oya gwanitha po oompumbwe dhomapipi tage ya. Esiku ndika olya ndhindhilikwa wo hali tyapulwa nokundhindhilikwa ongesiku lyaalongi uuyuni awuhe, onkene olyi na okusimanekwa.

Omukuluntusikola posikola Ehenye mOshakati Nyanyukweni Shaanika okwa ti okwa tseyithila aalongwa ye kutya oya ihulu ko ohela kosikola. “Uuministeli owa tula po okafudho okafupi komasiku ngoka, opo ku gandjwe ompito kaalongi ya tyapule esiku lyawo nombili, nohole, osho wo moshili nomomukalo omwaanawa,” ta ti ngaaka. Omulongisikola Secilia Martin okwa popi ta ti, aalongi oye na okusimanekwa nokupandulwa sho ya kala yi itula mo okugwanitha po iilonga yawo. “Otu uvite uuntsa oshoka esiku ndika otali ulike nkene twa simanekwa, ngaashi ngaa aanilonga yalwe haya simanekwa,” ta popi ngaaka. Omulongisikola gumwe natango posikola Ehenye okwa ti aalongisikola oya simana monkalamwenyo.

“Aalongi oye lile po okugandja uunongo wawo kaalongwa, ihe ohashi pula oshindji okuuvitha ko omulongwa a kale a taamba ko shoka ta longwa, oshowo okukwashilipaleka kutya oto gwanitha po iilonga yoye,” ta popi ngaaka. Ta fatulula ta ti, elongo oshitopolwa shonkalamwenyo. “Onkalamwenyo yomuntu ohayi longekidhwa kelongo,” ta popi ngaaka. Ta gwedha po ta ti, aalongi oye na okusimanekwa oshoka oyo haya xwaxwameke onkalamwenyo yomuntu monakuyiwa. Ta gandja oshiholelwa ta ti, aantu mboka inaaya mona elongo, oye li momapandaanda omanga mboka ya mona elongo lyi ihwa po, ye li moombelewa noye na iilonga iiwanawa.

vkaapanda@nepc.com.n