Opolisi moshitopolwa shaMusati otayi indile oshigwana shi longele kumwe nayo opo uulunga woopomba moshitopolwa wu hule po.
Omukuluntu gwopolisi moshitopolwa shaMusati Moses Simaho okwa ti opolisi moshitopolwa shawo otayi indile oshigwana shi lopote kehe ngoka ta ningile oopomba omuyonena, opo a mangwe po.
“Otatu kumagidha oshoka ope na omulumentu gomimvo 35 a mangwa po sho a adhika niitenda yoopomba, ihe sho a pulwa mpoka e yi kutha ita popi po,” ta ti ngaaka.
Omupevikuluntuwiliki muuministeli wuunamapya, omeya nomatalululo gomavi Eliajah Ngurare okwa ti onkalo oya nayipala, epangelo otali kondjitha okulundulula onkalo yaantu ya taalelwa kenota, ihe kombinga yimwe oshigwana otashi hanagula po shoka tashi etwa okuhupitha oshigwana.
Ta popi kutya oshigwana moshitopolwa shaHangwena osha tokola okuya po naakeleli mboka taya kala taya takamitha omahala goombola sho sha lulilwa.
“Ohashi pula oshimaliwa oshindji okweeta po natango oomboola ndhoka, ihe mboka haye shi ningi kaye na ko nasha,’’ ta nenyeta ngaaka.
Omupopiliko muuministeli wuunamapya Jona Musheko okwa ti oopomba 20 odha yakwa po moshitopolwa shaHangwena muule womwedhi gumwe nuumvo, ihe shoka otashi ningwa natango kiitopolwa yilwe moshilongo.
“Uulunga woopomba dhoomboola owu li pombanda moshilongo. Shoka otashi yematitha oshoka epangelo otali longo nuudhiginini okuyambidhidha oshigwana shi li mompumbwe yomeya,’’ ta nyenyeta ngaaka.
Ta ti, okulandulula oopomba ndhoka ohaku pula epangelo oshimaliwa oshindji. Noopomba 20 otadhi kotha oN$80 000, inamu kwatelwa iilonga tayi pula natango oshimaliwa sha thika N$20 000.
Ta ti, iimaliwa oyindji unene tayi zi moshiketha shepangelo ihe itayi longo shoka ya nuninwa.
“Natango katu na uuyelele wothaathaa mpoka hapu falwa oopomba ndhoka, ashike otatu fekele dhi na mpa hadhi falwa, omolwongushu yadho,” ta gwedha ko ngaaka.
Musheko okwa ti, uuministeli wuunamapya otau tsikile okunkondopaleka egameno lyoombola, nokwa kumagidha oshigwana shi kale tashi sile oshimpwiyu nokugamena oopomba dhoomboola.
- vkaapanda@nepc.com@na