New Era Newspaper

New Era Epaper
Icon Collap
...
Home / Iikundaneki oyi na uuthemba okupula omauyelele - Noa

Iikundaneki oyi na uuthemba okupula omauyelele - Noa

2022-05-20  Victoria Kaapanda

Iikundaneki oyi na uuthemba okupula omauyelele - Noa
Top of a Page

Omukuluntu gwokakomisi kokuunganunga nuulingilingi koAnti Corruption Commision (ACC), Paulus Noa, pethimbo a li ta gandja omalongo ge na sha nuulingilingi Etine mOshakati, okwa li a dhenge omuthindo konkandangala yiikundaneki okukondjitha uulingilingi.

“Uuna iikundaneki itaayi lopota ya manguluka, nena uulingilingi kau na esiku wu hule moshilongo,” ta fatulula ngaaka.

Ta ti, iikundaneki oya simana moshigwana, iikundaneki oyo hayi taandaleke uuyelele wontumba meendelelo. “Onda hala oku mu tseyithila kutya omwa manguluka okupula omauyelele agehe mwa hala okuza kehangano lyetu. Ehangano lyetu olyi li pamwe nane,” ta popi ngaaka. 

Noa ta indile ta ti, iikundaneki inayi kala hayi lopota ashike kombinga yomahangano gepangelo ihe nayi kale tayi lopota wo kombinga yomahangano gopaumwene.

“Mboka taya paathana ootendela momalelo goondoolopa naya lopotwe, opo ya ungaunngwe nayo,” ta popi ngaaka. 

Omayambulepo otaga holoka ashike uuna omalelo goondoolopa nonomalelo giitopolwa taga longo pauyuuki.

Ngoloneya gwoshitopolwa shaShana Elia Irimari okwa ti uulingilingi owa nika oshiponga oshoka ohau teya po einekelo mokati koshigwana.

“Sho osho shoka ekelelo lyuulingilingi lyi na okukala oshinakugwanithwa sha kehe gumwe moshilongo,” ta popi ngaaka.

Ta gwedha po ta ti, mpoka pe na uulingilingi itapu holoka ehumokomeho.

“Omolwetompelo ndyoka aakundaneki haya dhana onkandangala ya simana okupititha omauyelele agehe okutseyithila oshigwana.

“Out na okukala tatu gamene uuthemba waatoolinkundana ngele tau pititha omauyelele ga yooloka,” ta ti ngaaka.

Irimari okwa li a kumagidha ehangano lyokulwitha uulingilingi wu tsikele okulonga nuudhiginini okushunitha pevi uulingilingi moshilongo.

Aanambelewa yehangano ndyoka okwa li ya popi kutya oya kala nokugandja omalongo nkene okwiikaleka kokule nuulingilingi oshowo oonkatu ye na okukutha uuna ye wu tsakaneke.

– vkaapanda@nepc.com.na


2022-05-20  Victoria Kaapanda

Share on social media
Bottom of a page