Eegululo pambelewa lyokapale okanene nene komaudhano mOndangwa taka ithanwa Northern Namibian High Performance Sports Centre olya ningwa mEtitano mOndangwa.

Ominista yaagundjuka nomaudhano Agnes Tjongarero ngoka a patulula iilonga yokapale pambelewa okwa ti etungo po lyokapale hoka olya kala oshinima sha tegelela nosha halika koyendji. 

Okapale hoka otaka ka kala endiki lyoku kwathela ekoko lyaakuthimbinga momaudhano gayooloka, nomaudhano ngoka oga kwatela mo okatanga kokoompadhi, oku matuka nomaudhano taga ka kala po otaga ka kwatela mo gomoshilongo nogopaigwana.

Tjongarero ta ti okapale hoka otaka kakala oko emanga lyokolonela lyiinyangadhalwa yomaudhano moshitopolwa.
“Etingo lyokapale olyo owala etameko. Muukumwe otatu ka sa oshisho kutya otaka ka kala ke na omwenyo, nota ka kala endiki lyasimana komaudhano nosho wo kaakwashigwana,” Tjongarero ta ti.
Omunista yeyambulopo lyoondoolopa niitopolwa yokuushayi Erastus Uutoni moshipopiwa she shoka sha leshwa pehala lye okwa ti iinyangadhalwa yoludhi ndoka itayi eta po ashike ekoko lyopaliko, ashike otayi eta ehumokomeho lyopankalathano.

“Omaudhano ogo elaka lyopayuni, ogo oshinima shoka hashi uvika ko kaantu oyendji, noga tseyika onga omuhanganithi omunene. 

Okwa tsu omukumo omalelo goondoolopa opo ga itule mo meetepo nomekokeko lyomatungo miitopolwa nomoondoolopa dhawo. 

Okapake hoka okwa tengenekwa kaka tungwe po koshimaliwa shoomiliona N$60 nokwa tengelelwa ka pwe okutungwa meni lyomimvo ntano dhi li komeho. -Nampa