ONDONGA - Omupresidente Nangolo Mbumba okwa lombele aapolisi yaNamibia ya hulithe po oku ya aakwashigwana moshipala ngele taya ka landa iilya yomahangu koAngola.

Mbumba okwa po pi ngaaka Etitano petulopo lyendhimbulutho-hala lyomuthigululwakalo gwaNdonga, komukunda Ondonga moshitopolwa shaShikoto. Pehala mpoka opo pu na Ompampa yOmukwaniilwa omutitano gwaNdonga, Nangolo dhAmutenya ngoka a lele okuza mo1810 sigo 1857.

“Aapolisi taya gamene koongamba naya ethe Aanamibia ya lande omahangu koAngola. Omahangu oge na shike?” ta pula.

Ta kumagidha kutya aantu mboka taya longele epangelo, ye na iinakugwanithwa yoku topolela iikulya, inaya ikuthila kaye iikulya mbyoka. 

“Natu topolalatheni shoka shili po, natu paatheni uumeya  ngoka a mono okulya nalye, nombili,” Mbumba ta kumagidha ngaaka.

Ta gwedha po kutya iishinda longo nayo oya taalela oshikukuta naangoka a hala uusila weepungu shapo otaka tala koTanzania.  

“Omudji ota mu ka pandje ombedhi kutya sho nda ningi omupresidente onda e telele oshikukuta. Hangaye nda e ta oshikukuta, ihandi lokitha omvula,’’ ta po pi ngaaka.

Omukwaniilwa gwOndonga Fillemon Shuumbwa Nangolo esiku ndyoka okwa ti mboka yuuvite kutya omukwaniilwa okuna ooprogalama odhindji unene, ota hala okumana okugwanithwa po iithigilwalonga.

Omukwaniilwa okwa po pi kutya ko kule ihaku thikwa ngula. 

“Onda gwanithwa po shoka nda thigi nda lombwelwa komukwaniilwa Immanuel Kauluma Elifas kutya emanya lyaMutuni lyi kale lya ningwa,” ta po pi ngaaka.

Ta ti nonando ka kwali a thigilwa sha shoka e na okuli ninga nalyo okwa kondjo sigo a gwanithwa po shoka a lombwelwa mwa kwatelwa “Oompampa”.

Nangolo okwa fatulula kutya oompampa omagumbo gaakuluntu, ihadhi ite ntekwa ashike e to tameke okudhidhika, ihe opena omilandu noonkuluhedhi dhoka hadhi landulwa.

 Oshigwana osha gongele oomilliona N$1.2 okutunga ehala ndyoka.

– vkaapanda@nepc.com.na