Komufala woGreen Hydrogen moNamibia James Mnyupe, okwa hafela oilonga yogreen hydrogen ya longwa komukunda Daures oo u li pamufika wodoolopa.
Opoloyeka ei i li moshitukulwa shErongo, oi li imwe yomeepoloyeka dogreen hydrogen moshilongo, nokwa teelela i tameke okueta po oilongwamo ngaashi ogreen hydrogen, ammonia, nomadama matwima okutameka muJuli neudo.
Mnyupe okwa ti efindano loDaures green hydrogen project ota li ka ulikwa komaulikilo opaunyuni oWorld Hydrogen Summit oo taa ka kala koRotterdam shaNetherlands momafiku 13 fiyo 15 Mei 2024. “Omalalakano manene opologalama yogreen hydrogen moNamibia a kwatela mo opoloyeka yaDaures otaa ka ulikilwa kovanangeshefa ovo ve na omafa oku tula mo oshimaliwa shihapu mokungeshefa naNamibia momuku ou weenghono uhe na oshilanduli,” Mnyupe ta ti pefimbo lomutumba wa li keumbo lepangelo.
Jerome Namaseb, omukulunhuwiliki wehangano loDaures Green Hydrogen, pefimbo leengundafana nOmupresident Nangolo Mbumba okwa ti petameko lopoloyeka oyo, ota ku ka longwa eetona 18 dogreen hydrogen neetona 100 doammonia kodula. Ta ti opoloyeka otai ka longa oikwambidi noiimati oyo tai ka liwa moshilongo.
Namaseb ta ti ongeshefa otai lalakanene yoo okuetapo oushosho woammonium sulphate.
“Ou otau ka kakala oushosho wotete woludi eli tau ka longwa moNamibia osho notu wete tashi ka kala efindano linene kwaaveshe ovo ve li moshimungu eshi.
Otashi ka kwafa yoo ovanafaalama vomoshilongo keendado doamonia odo di li pombada neenghono mounyuni,” Namaseb ta ti.
Momudo 2022, Namibia opamwe nepangelo laGerman ovashaina eudafano loJoint Communique of Intent (JCOI) opo Germany a yandje oshimaliwa shifike peemiliona N$816 koku ninga omalolelo eepoloyeka doludi eli moulefimbo womido nhano.
Namaseb ta ti etungo po lopoloyeka yokoDaures ola kwatela mo omalolelo oo taa ningwa koshimaliwa shadja moshikefa shoJCOI.
Mnyupe ta pula epangelo opo li kufe ombinga mongatu yalandula ko yopoloyeka.
“Eshi sha kala ko oshepangelo letu li dane ongandangala mopoloyeka ei shaani epangelo laGerman ole tu vatela fiyo opapa tu li nena, otu na oku twa oukuni kumwe opo tu yambule po opoloyeka ei, hatu i eta pondodo i li nawa opo tu ete noilonga moshilongo,” ta ti ngaho. - Nampa