OTJEKUA - Ehangano loNampower ola longifa oshimaliwa shobiliona N$1 mokutunga eesasiona mbali di na eenghono dolusheno do400kv. 

Eesasiona edi odi li kOmatando moshitukulwa shaShana oshoyo mOtjekua moshitukulwa shaKunene.

Pefimbo leyuululo leesasiona, omukulunhu waNampower Simson Haulofu okwa ti kutya elalakano lokutunga eesitaasi okunghonopaleka eandjaneko lomalusheno monooli aishe.

Eesitaasi otadi kwafele yoo okushakeneka ondjilakati ositaasi shakula shaRuacana eshi hashi yandje olusheno shito, shaashi vati paife ita i nane va li noudjuu.

“Eesasiona natango otadi ka nghonopeka yoo oukaume oshoyo nekwatafano liwa shaashi olusheno natango otali ka yandja omakufikufi e na eenghono moAngola,” Haulofu ta ti.

Nampower natango okwa tunga yoo omatungo e na oilongifo yokuyandjakanifa olusheno koitopolwa ya yooloka oshoyo okunana eenghono di na o400kv moKunene.

Ova ti natango ove na omadiladilo okutula oilongifo oyo tuu oyo tai ifanwa Shunt Equipment moAuas, Kokerboom, Gerus nomObib oshoyo oshilongo ashihe.

Haulofu okwa yelifa yoo kutya Nampower okwa longifa eemiliona di li N$3.2 okutungila eefikola da fika punhano omaluumbo oshoyo mewapeko loshitukulwa shaKunene.

Minista wouministeli womahooli noikwamina Tom Alweendo oo naye a li poshivilo, okwa ti eandjaneko lolusheno okwe li pandula shaashi otali vatele ovanhu avashe vomeedolopoa oshoyo komikunda.

“Eshi otashi eta eputuko lamatutu moshiwana,” Alweendo ta yelifa.