Kakukutu wopolifi moNamibia Inspector General Sebastian Ndeitunga okwa ti ombelewa yaye otai ka ninga omakonaakono omoule kombinga yefyo lokaana keedula 13 ka lopotwa neudo eshi ka fya konima eshi kwa li a ka ningilwa oilonga youshada yopaixulo kuxe.
Ndeitunga okwa ti osha puka unene eshi opolifi moshitukulwa shaHangwena ya ti kutya kape na sha eshi tashi ningwa po shaashi oshibofa osha lopotwa kwa laata, na vali shaashi omudimba owa pakwa nale.
Okwa hokolola ta ti oshikumungu eshi oshi na okukala sha landulwa fiyo ouyelele tau uya kombada shaashi otashi nyemateke unene kokaana keedula dishona ka fya eshi ka kala ta ka ningilwa omahepeko opaixulo.
Edi Ndeitunga okwe di popya Etitatu eshi a ninga eenghundafana naKundana ta ti kutya okaana itaka dulu okukana ashike ngaho nande opolifi ya lopotelwa kwa laata.
“Ohatu faneke opo tu kale twa fudula mo olotu lokaana opo tu dule okukala twa ninga omakonakono omoule, otwa hala okaana ka kale ka mona omakwafo nonande oka fya nale,” Ndeitunga ta ti.
Okwa weda po ta ti omunhu ngeenge okwa fya ndele ouyelele tau ya kombada konima yepako kutya okwa fya koshike, oshiwana oshi na oufemba wokushivifila opolifi opo opolifi i kale ya ninga omakonakono diva.
Neudo momukunda Olukula moshikandjohoololo shaKongo moshitukulwa shaHangwena omwa lopotwa oshiningwanima sha kumwifa oshiwana eshi okaana keedula 13 ka fya konima eshi kwa li haka kwatwa onghonga kuxe.
Nokonima okaana oka ka tameka taka vele loikando ihapu fiyo taka xulifile moshipangelo shaKongo.
Ovakwapata novashiinda ova yandja ouyelele kutya okaana oka kala taka mono oixuna eshi xe yako e hole okuya moixulo nokaana kondado N$50.
Minista youkashikekookanhu nonghalonawa yokaana Doreen Sioka naye okwa kumwifa koshikumungu eshi, okwa ti ovadali vokaana aveshe nava kwatwe po opo va shive va ye modolongo.
Konima yoivike ivali pefimbo Sioka kwa li a ninga eenghundafana naKundana okwa hokolola ta ti omudimba wokaana nau fudulwe mo medu opo u kale wa ningilwa omakonakono omoule.
Minista okwa ti opolifi nai kale tai longo oilonga yayo moshili nopauyuuki.