ONGWEDIVA - Oshilyo shongundu tayi pangele Swapo, Sigo Amunyela  okwa ekelehi omapopyo ge li komalungula taga ulike kutya okwa thigi po ongundu yoSwapo opo a ka wayimine o-IPC.

Amunyela ta ti nande kehe gumwe a thige po ongundu Swapo, ye ke na mpoka tayi. Amunyela okwa li ta popi ngaaka omolwomapandja ga totwa koFacebook hoka kwa nyolwa omahokololo kutya okwa ningi omulanduli gwongundu yo-IPC.

Ta ti ota lundilwa, epandja lye lyoFacebook anuwa olya ponokelwa kaantu ke ya shi, mboka ya kala nokushanga ko kutya “Aakwaswapo yamukulii ndje. Esimano lyashike ndi li moSwapo?  Omolwashike mu uvite uudhigu nda thiga po oSwapo? Swapo kayi shi ongundu yafa oonkwawo ndhoka hadhi thigwa po?

“Otamu ningile ndje nayi niingodhi yeni, omuntu a li e na okukumagidha ndje okwa hula ko, ye oye a li e na okuulika ndje ndi ye pombanda, omwenyo gwe nagu vululukwe Dr Hage Geingob. Opoosa yini mwa pa ndje moSwapo? Nau te tawu yolo”. Ta ti oshinina shoka hasho ashike sha shangwa komalungula nelalakano okunyateka edhina lye.

“Iinima oyindji iiwinayi kombinga yandje komalungula, ondi wete kutya otaya kondjitha okuteya esipa lyombunda yoSwapo okupitila mungame, ihe shoka itashi piti,” Amunyela ta popi ngaaka. Ta ti, okwa kala nale omulanduli gwomupevipresidente Netumbo Nandi-Nditwah, kandi uvite ko etompelo lyomuntu ngoka e ya po noshinima shika.

Amunyela okwa ti, ke na uuyelele kutya olye te shi ningi, nonando a kambadhala okukonga ngoka te shi ningi. “Ngele onde mu mono, ondi na oku mu katukila onkatu, oshoka okwa kakeke edhina lyandje. Ngele okwa ningi omupya e tandi mu mono oku na okuyeleka edhina lyandje,” ta popi nongeyo.

- vkaapanda@nepc.com.na