Omuhongifikola omukainhu weedula 45 vati okwa dengwa nenghava komudali wokaana ke li mongudu yaye.

Oshiningwanima osha ningwa Etitatu kofikola Okanguati Combined School moshitukulwa shaKunene.

Omukulunhu wokoshikondo shokukonakona oimbuluma moshitukulwa shaKunene, omupedukomufala Paavo Iiyambo okwa hokolola ta ti omuhongifikola okwa li ta lombwele ounona voukadona vavali va ye mongulufikola ashike mboli ova haluka nokulidenga omitwe mumwe. 

Ounona ava ove li mondodo onhivali nokwa li tava danauka pondje pefimbo vakwao kwa li ve li mongulu tava longwa.

Okaana kamwe oka tameka ta kadi ohonde komutwe.

Opolifi oya hokolola tai ti okaana oka lombwela ina keumbo nokonima ina okwa ya kofikola.

Omudali ou okwa pula kutya okwa hala okupopya nomukulunhufikola ashike ka li po pofikola efiku olo.

Omuhongifikola okwa lombwela ina yokaana kutya ne uye efiku la landula opo a dule okupopya nomukulunhufikola. Ohaluka omudali ou okwa nhukila omuhongifikola ndele te mu denge nomanghava nonomamanya.

Ovahongifikola pofikola opo ova endelela ndele tava kufa ovaikanhu ava kumwe pefimbo lolwoodi.

Omudali, omunamido 48 okwa kwatwa po nota holoka momhangu nena.

- fhamalwa@nepc.com.na