Omunamivo 29 ngoka e li omukeeleli gwomaliko okwa yahwa kaafuthi nokusa, ethimbo kwa li ya ponokele ondingosho tayi ithanwa Brazzaville yi li pomudhingoloko gwaShigambo, nokuya niimaliwa N$18 000.

Sha ikolela komugandji gomauyelele moshitopolwa shaShikoto Ellen Nehale, oshiningwanima shoka osha holoka koongulasha dhOlyomakaya momukanda Okalunga. Otaku hokololwa kutya aalumentu yeli yane okwa li ya ponokele ehala ndyoka lyomanwino, noku yaha omukeleli gomaliko nokusa ethimbo olyo tuu ndyoka.

Aalumentu mboka ye li yane, anuwa okwali ya tsikile okuya mondunda moka muna omulandithi.

Okwali anuwa ye mu pula a gandje ooshapi dhoshiketha shiimaliwa, nokutha mo iimaliwa Omukiintu ngoka anuwa ka kwali a ehamekwa, naafuthi okwali ya yi ontuku nohauto yoSedan
Opolisi otayi indile moshigwana kehe ngoka ena uuyelele kombinga yoshiningwanima shoka, alopotele opolisi yi li popepi naye, opo aafuthi mboka ya vule oku mangwa.

Shoka osha ningwa ashike omasiku omashona, sho omulumentu gwomimvo dhopokati a li a ponokelwa nokuyugwa iinima ye kaafuthi molukanda Oshoopala, mOshakati.

Sha ikolelela kopolisi moshitopolwa shaShana oshiningwanima shoka osha holoka moshanga shomutenya, nomulumentu ngoka okwali amonithwa oshiponga noonkondo.

Otaku hokololwa kutya omulumentu ngoka okwali uumbwa nemanya komutse, eta gwile pevi, naafuthi mboka oya li yayi ontuku niinima ye mbyoka ali ena mwakwatelwa ongondhi ye yopeke.

Omukuluntu gwopolisi moshitopolwa shaShana Naftal Lungameni Sakaria okwa koleke kutya olukanda ndoka olwa nika oshiponga, naashoka oye shi ndhindhilika. ‘’Epandaanda ndyoka lya kunkula olukanda ndoka okuza koService yEkuku sigo okomatungo omanene gaGame, olya nika oshiponga. Ngele etango lya ka pa oyana, ito ende po inoo yugwa iinima yoye,” ta fatulula ngaaka. Ta ti, opolisi oya kambadhala okupatolola olukanda ndoka iikando oyindji.  Noya ndhindhilike kutya iiningwanima tayi ende yu uka pevi, nonando natango otayi holoka, kokutya opatolola oya nengeneka onkalo molukanda ndoka.  “Otatu thaneke okutula mo uuthano, opo shi kale oshipu kutse okumona mboka haya longo iilonga mbyoka, oshoka uuna ya tondokele molukanda moka ohashi kala oshidhigu oku ya mona,” ta ti ngaaka. Sakaria okwa kumagidha wo natango aakalimo yomolukanda moka ya kale taya lopota uuna ya mona aafuthi mpoka ya tondokele, oshoka oyendji ohaya kala ye ya shi, ihe kaye hole oku ya lopota.

vkaapanda@nepc.com.na