New Era Newspaper

MTC Shares
Icon Collap
...
Home / Omukulupe a kengelelwa oshimaliwa shaye

Omukulupe a kengelelwa oshimaliwa shaye

2021-07-30  Festus Hamalwa

Omukulupe a kengelelwa oshimaliwa shaye
Top of a Page

Omukulupe weedula 60, okwa kengelelelwa oshimaliwa N$50 000 kovalumenhu va longela kumwe nokakadona oko vati ka lombwela omusamane oo kutya okwali heka longo ofikola.

Otaku hokololwa omukulupe ou a shakena nomukainhu ou mofitola yoBuild-It mOshakati omo a li ta landa oingifo yeumbo laye. 

Ompupiliko wopilifi woshitukulwa shaShana Inspector Thomas Aiyambo okwa hokolola omukainhu ou okwa lombwela omukulupe kutya Martha, omuhongwa waye mukulu. Omukulupe vati okwa pula omukainhu ou opo e mu ulikile efano laye lokofikola ye a shiive emu dimbuluke, ashike omukainhu ou okwaanya.

Aiyambo okwa ti okudja opo omukainhu okwa landa oshako imwe yosameende ndele ta pula omukulupe opo emu kwafela emu twalele keumbo kOkatana noshako yaye. Manga inava hanga Okatana omukainhu vati okwa ti hala mboli okwa hala oku twalwa kuAmutanga, ashike omukulupe ou okwe shaanya.

Oku dja opo vati omukulupe okwa kanghama ponhele yokunwefa omaholi ili pOkatana ndele ta lombwele omukainhu ou a ku fe mo samende yate motuwa.

Ohaluka puvo ope ya ovalumenhu veli vaheyali tava ti kutya vo ovanambelewa vopolifi, nova lopotelwa kutya motuwa yomusamane omu na omayoo omhanda. 

Ovalumenhu vati ova hada mokandjato komukainhu oka kali ka fiwa poshipundi motuwa noku kufa mo omayoo omhanda oipupulu, ndele tava lombwele omukulupe kutya ota kwatwa po kopolifi shaashi okwa hangika e na omayoo omhanda.

Aiyambo okwa ti omulumenhu umwe a djala oikutu yopilifi yoipupulu okwa lombwela omukulupe opo aye akanane oshimaliwa kombaanga yaye shi fike 50 000 shaashi vati okwa hangika e na oinama inai pitikwa.

Eshi omulumenhu a pewa oshimaliwa osho a pula okwa lombwela omukulupe opo a shinge a yuka kombinga yOkompumbu.

Eshi va fika kOmpumbu ova tameka okuvalula oimaliwa ei va pewa komukulupe, ndele tava she ndje oikutu nokulombwela omukulupe a shune oku a dja.

Aiyambo okwa kunghulila oshiwana opo shi kale sha tonata ngeenge sha shakeneka ovanhu voludi latya ngaho, noku lopotela opolifi diva.  

Lwopokati opo opolifi oya koleka oshiningwanima shikwao shomulumenhu weedula 55 a ningilwa omatilifo meumbo laye momukunda Eenghala popepi nOngwediva potundi 09h30 kovalumenhu vahamhano, opo vati a ka tale okakalata kaye kombaanga opo vati akanane oshimaliwa. Ounona ovo va mona eshi tashi ningilwa xe ove shi pondola oku dengela opolifi. Eshi opolifi ya fika ovalumenhu vatano ova faduka po omanaga omufekelwa weedula 59 ou a li ta shingi otuwa okataxi konomola N17131ND a kwatwa po. 

Aiyambo okwa ti omakonakono opolifi nghee taa twikile.


2021-07-30  Festus Hamalwa

Share on social media
Bottom of a page