Charles Ndeumane

ONDANGWA – Omukulepe gwomivo 60 okwa patululilwa oshipotha shonkambadhala yedhipago noshowo shehepeko lyomomagumbo sho anuwa a tsu nokweehameka ohonda ye, omukiintu gwomivo 29 sho e mu stu nombele mepunda.

Oshiningwanima shika tashi kumitha osha holoka mEtitatu molukanda Onguta mOndangwa.

Opolisi otayi hokolola kutya anuwa omufekelwa nanakuningwa oshihakanwa mboka ye na ekwatathano lypaihole, oya li taya nyenyeta kombinga yongodhi anuwa ya yakwa po shoka sha eta opo omulumentu a kuthe ombele nokutsa omukiintu gwe nombele mepunda kombinga yokolumoho.

Ta ti anuwa nakuningilwa omunyonena oku li monkalo ombwiinayi, a kwatelwa moombete moshipangelo shaNandjokwe.

Omulumentu ngoka oye anuwa mwene gwehala lyomamwino lyedhina Grow Man Shebeen mOnguta ye oye mwene gwombele ndjoka a longitha. Moshiningwanima sha yooloka, omukulupe gwomivo 67 oku li moombete sho a tsuwa nombele oshikando shimwe mepepe. Shika osha ningilwa molukanda lwOneshila mEtitatu oshiwike shika.

Omufekelwa nakumomitha omukulupe nguka nguka oshiponga, naye okwa mangwa po, nokwa holoka nale mompangu. Omakonakono gopolisi otaga tsikile moshiningwanima shoka.

Mehuliloshiwike sha za ko, omulumentu gwomivo 31 omukalimo gwomOngwediva okwa hulithile mondjila yokuya koshipangelo konima sho a tsuwa nombele iikando ya thika pwiiyali mombunda nokepepe pehala lyomanwino lyedhina Rasta Kapana.

Otaku hokololwa kutya omufekelwa ngoka a kwatwa po kopolisi okwa li ta fekele kutya nakusa okwa yaka po ongodhi ye.

Omupopi l iko gwopol i s i mOshana inspekta Frieda Shikole ngoka a koleke iipotha ayihe itatu okwa londodha aakwashigwana opo kaya humbate iilwitho ngele taya yi komahala gomanwino.

“Iimbuluma yokutsa aantu noombele otayi indjipala unene moshitopolwa unene tuu pomaha gomainyanyudho, otandi indile aakwashigwana kaaya humbate oombele, oosikulufu oshowo iilongitho ya honga ngele taya yi koomba nokoondingosho,” Shikole a ti ngaaka.

Shikole okwa koleke wo oshiningwanima inaashi faathana niiikwawo moka eloli lya humbata iipakete yoombiila gu kopate ohela lopotundi 01h00. Shika osha holoka pethimbo lyongula onene lwopeinda lopolisi mOngwediva.

Shikole okwa ti otaku hokololwa kutya omuhingi gweloli okwa li ta kambadhala oku henuka ohauto tayi zi komeho sho a nyengwa okupangela eloli ndyoka sigo lya gu ko kopate.

Ta ti omuhingi ina mona oshiponga shasha, oombiila owala dha tatuka.

-ndalikokulep@gmail.com