Omukulupe gwomimvo 89, okwa mangwa po koshitopolwa shaMusati sho anuwa a kala nokukwata koonkondo omutekulu gwe gwomimvo 14.

Oshiningwanima shika osha holoka momukunda Oshikushomunkete ethimbo nomasiku inaaga tseyika.

Sha ikwatelela kuuyelele wa gandjwa komupehakuluntu gopolisi moshitopolwa shaMusati Moses Simaho, omukulupe ngoka okwa kala anuwa ha ithana okanona kegumbo lye, hoka ha monene ompito oku ka kwata koonkondo. Inashi yela kutya omukulupe nguka okwa longo iilonga mbika yiixuna ethimbo lyi thike peni.

Ohelahela oshifo shika osha lopota oshiningwanima sha holoka moshitopolwa moka omusamene gwomimvo 69 anuwa a kwata okatekulu ke komimvo ndatu koonkondo.

Omukuluntu gwopolisi moshitopolwa shaShikoto Teopolina Kalompo-Nashikaku okwa ti oshiningwanima shoka osha holoka momukunda Etuli moshikandjohogololo shOmuntele, Osoondaha.

Otaku hokololwa kutya shoka hasho oshikando shotango omusamane ngoka ta kwata omutekulu koonkondo, oshoka okwa li a adhikilila omumvo gwa zi ko te shi ningi ihe kakwa li a lopotwa kopolisi.

Omukulupe ngoka anuwa okwa li a lombwele aanona yalwe yomegumbo ya ka lithe, e ta lombwele okanona hoka ka kale po.

Konima okwa adhikilila komwana ta tsu okanona noonyala puukiintu.

Inapu pita ethimbo sho omukulukadhi gwomimvo 37 gwomoshitopolwa shaShana a kwatwa sho anuwa a kala nokukwata koonkondo okanona ke kokamati komimvo omugoyi.

Omukiintu ngoka ngaashingeyi oku li konima ye kumba, noshipotha she osha undulilwa komasiku 30 gaMei nuumvo.

Otaku hokololwa kutya omukiintu ngoka okwa kala nokufika oshowo okudhengagula okanona ke ngele taka tindi okuya naye momilalo.

Nonando a li ta gandja ombili komupangulu esiku a li a holoka mompangu, okwa po pi kutya okwa kala nokukwata koonkondo okanona ke oshoka kuume ke komiihole oku li kuushimba.

-vkaapanda@nepc.com.na