Victoria Kaapanda

EHEKE - Aakalimo yomoshipotopolwa shaShana oye na uumbanda kutya omvula ndjoka ya kala nokuloka omasiku gaali ga lambthana otashi vulika yi ka ete efundja. Nangula Thobias, omukalimo gwomOshakati okwa li a lombwele Kundana ta ti egumbo lye olyi li kohi yomeya. Thobias ta ti omvula ngele oya tsikile tayi loko ope na ompito onene ya kale ya pumbwa okutembuka oshoka ota ka kanithila mo omaliko ge momeya. 

“Shika kandi shi we ngele omeya gomvula nenge efundja,” Thobias ta ti ngaaka. Nonando onooli ayihe konyala ya mono omuloka omwaanawa, oshitopolwa shaShana osha lokwa omvula oyindji lela naashika osha etela aakalimo uumbanda wefundja.Omvula sho ya loko ngeyi, iishana otayi imemeha yu udha omeya, omagumbo oga kundukidhwa komeya, noondjila dhiihauto ongohela dha li po, dha dhima po ngashiingeyi. Omukalimo gumwe gwomoshitopolwa shaShana Maria Negonga okwa ti enyanyu lye enene shili omolwa omuloka omwaanawa, ashike ota ti kape na oshinima shaa na uuwanawa nuuwinayi.

“Omvula ohayi tu etele uuwanawa owundji mwa kwatelwa iipalutha yaantu niinamwenyo, ashike ngele natango ya loko unene ee tayi udha iishana ohayi vulu wo okufaalela oomwenyo dhaantu,” Negonga ta popi ngaaka nomalimbililo.

Ta kumagidha aanona ya kale kokule niishana yomeya osho wo mboka haya nu omangandja kaaya pitililithe okunwa kwawo sigo opompito taya ka nyengwa okutaaguluka omeya.