Kansela woshikandjohoololo shaWalvis Bay shokoushai Florian Donatus okwa ti ovanhu va pilwa eebashu omafiku aa moshikandjohoololo shaya ova pewa omayambidido.
Donatus ta ti ovanhu ava ova pewa omakwafo oikulya, oikumbafa, oikutu, eetenda dokudja nomidjalo fikola dounona ovo navo va kanifila mo omidjalo davo. Okwa ti oshiwana otashi ka pewa yoo vali omikanda doufemba ngaashi outwe needjapo domadalo kouministeli woikwameni netanatelo lokeengamba.
Omafiku a pita okwa lopotwa eebashu 23 da pya po komundilo da fiya ovanhu poluhaela kolukanda Tutaleni modoolopa yaWalvis Bay.
Okwa li kwa lopotwa kutya ovakalimo ova kanifa omaliko avo aeshe nokaana kamati keedula nhatu oka xulifila mo.
Donatus okwa ti ombelewa yaye pamwe nombelewa yangoloneya woshitukulwa Erongo otava twikile nokuyambidida ovanhu va ninga oihakanwa yomundilo eshi va pilwa omaliko avo.
Kansela okwa ti okwa kwatafana nombelewa youministeli wehongo yokuyandja eendjapo dondodo onhi-10 nonhi-12 opo ovanhu va pilwa eendjapo davo va kale va pewa eendjapo dimwe osha li.
Okwa ti ovakalimo ohava di ponhele apa kwa li pena eebashu davo, manga elelo la muni tali va kongele onhele ya kula apa tava ka tungila omalukalo avo.
“Muni waWalvis Bay okwa wapaleka ponhele opo ha padi ovakalimo shaashi okwa li peha di ondova konima eshi eebashu da pya po,” Donatus ta ti.
Okwa indila ovasamaria opo veu ye va yambidide ovakalimo va ninga oihakanwa yomundilo shaashi ombelewa yaye itai dulu okuwanifa po eemhumbwe dovakalimo adishe.
Okwa ti ku keshe ou e na e halo lokuyambidida nakwatafane nombelewa yaye ile nombelewa yangoloneya yoshitukulwa.
Kansela okwa kunghulila oshiwana opo shi kale takamife omundilo shaashi okwa didilikwa odoolopa yaWalvis Bay noSwakopmund hai pilwa eebashu dihapu neenghono.