Hilma Nakanduungile

OKONGO - Ominista yuukashikekookantu, ekondjitho lyoluhepo nonkalo nawa Doreen Sioka okwa indile opo aakuthimbinga ayehe melongo nomeputudho lyaanona ya kuthe ko oongaku nokutula uukuni kumwe opo ku kondjithwe omasimbapalo gaanona.

Sho a popitha engathithi lyaakwashituthi pethimbo lyedhimbuluko netyapulo lyesiku lyokanona Okaafrika poprimaskola Nghifikwa Ndailikana moshitopolwahogololo shaKongo mOhangwena, Sioka okwa holola eiuvonayi lye molweindjipalo lyomwaalu gwaanona  taya ningi omategelelo, shoka ta ti otashi yi eilongo nonakuyiwa yawo moshipala.

“MOhangwena amuke, omwa lopotwa omwaalu gwaanona ye vulithe po9 000, ye li kohi yoomvula 19 ya ninga omategelelo, pokati kaJanuali 2020 naApilili 2024. Omwaalu nguka otagu pula opo tu kuthe onkatu yomeendelelo okukondjitha omukundu nguka, molwashooka uunona owundji wuukadhona otawu yonenwa oonkalamwenyo dhawo kesimbapalo,” Sioka ta ti ngaaka.

Ta indile ayehe ye na mo onkandangala muukalinawa waanona opo ye ya longe noku ya kunkilila shi na sha noshiponga shokuninga omategelelo poomvula ndhoka, yo ya gandje wo omakwatho kaanona mboka ya ninga iihakanwa. 

“Epangelo, aalongi, aavali naayehe ye na oshinakugwanithwa shuukalinawa waanona, omukundu gwaanona taya ningi omategelelo otatu gu kandula po ashike uuna twa hanganeni muukumwe. Uuna aanona inaaya piyaganekelwa eilongo lyawo, otaya vulu nduno oku adha shoka taya lalakanene nosho wo okukutha ombinga mehumithokomeho lyoshilongo,” Sioka ta ti.

Sioka okwa kunkilile wo aanona opo yaa pitike nande olye a ye nayo miihulo, molwaashoka otashi ya yonene eilongo noonakuyiwa dhawo. Ta tsu aavali naatekuli omukumo ya tume aanona koskola, unene tuu aanona yaamati mboka kwa konekiwa taya tumwa ya ka takamithe iimuna, pehala lyokuya koskola.

“Aavali naatekuli yaanona, unene tuu yaamati hulithiipo okuyatuma ya ka takamithe iimuna pehala lyokuya koskola. Alikana aanona naya ye koskola, molwashoka mongashingeyi aanona yaamati oya thigala po, okweelekanitha naakadhona,” Sioka ta indile.

*Hilma Nakanduungile omunambelewa gwomauyelele muuministeli womauyelele nomakwatathano gopaungumba mOhangwena.