“Onda loloka okulundilwa kutya vati ohandi li po oimaliwa yelelo lOukwanyama, kandi na mbili vali ya wana, kashipu okukala omunashipundi welelo lOukwanyama shaashi ou na okushakeneka omashongo ahapu.” 

Aa omatumbulo omunashipundi welelo lOukwanyama George Nelulu ta hokolola nghee a kala ta longo noudjuu pefimbo eshi kwa li ta yakula onga omunashipundi welelo lOukwanyama.

“Onda taatawa moilonga oikando ivali shaashi vati ohandi li po oimaliwa ashike inandi teka omukumo wokukala handi longo nelitulemo,” Nelulu ta ti.

Nelulu edi okwe di popya Etine keembelewa delelo laUkwanyama pOhangwena eshi a hokolola ta ti ina hala vali okukala omunashipundi welelo laUkwanyama shaashi okwa loloka okukala ta lundilwa kutya vati ota li po oimaliwa yelelo laUkwanyama.

Efiku tuu olo Nelulu okwa lombwela ohamba yOvakwanyama Marta Mwadinomho YaKristian Nelumbu  ta ti yee ina hala vali okutwikila oshilonga shokukala omunashipundi welelo laUkwanyama ashike  ota twikile okukala elenga loshikandjo shEudaneko.

“Ohandi yandje oshipundi eshi shounashipundi kohamba yOvakwanyama opo i tale kutya olye tai tula po a kale ta yakula onga omunashipundi shaashi ame onda loloka ohandi ka fuda po manga,” Nelulu ta ti.

Nelulu okwa ti ita efa okuyandja omayele kohamba ngeenge ya pumbwa okupewa omayele aye shaashi natango ota twikile okukala e na ekwatafano liwa nohamba. Okwa ti okukala omunashipundi welelo lOukwanyama ota tonatele oikandjo ihapu kasha li shipu kuye shaashi okwa kala a shakeneka omashongo ahapu eshi oshiwana hashi kala tashi kakeke edina laye. “Konima eshi nda lundilwa kutya ohandi li po oimaliwa, ovanambelewa va ka tala momambo omavalulilo opo va tale ngeenge onda lya po tuu oimaliwa shili, ashike eshi va tala momambo inava mona ouyelele kutya onda lya po omaliwa,” Nelulu ta ti.

Onghee kandi na vali ombili ya wana yokukala andi twikile okukala omunashipundi welelo laUkwanyama shaashi onda taalela omashongo ahapu eshi omalenga makwetu a hala okukufa po oshipundi shelelo loukwanyama.

Nelulu okwa ti pefimbo eshi  kwa li a ulikwa kohamba opo  a kale omunashipundi welelo laUkwanyama omalenga amwe kakwa li a hafa.

“Pefimbo eshi nda ninga omunashipundi welelo laUkwanyama moshikefa shelelo laUkwanyama inandi hanga mo mu na oshimaliwa, ashike onda hanga elelo laUkwanyama li li meendjo. Onda kala nokulonga noudiinini opo ndi dule oku eta oshimaliwa moshikefa nokukala twa futa eendjo dovanhu, omo nokuli mu na oshimaliwa shihapu paife,” Nelulu ta ti.

Okwa ti okwa kala nokukaleka po omilandu diwa pamwe nomukulukadi waye ou a kala ta yandje omadeulo koohamushanga vomelelo laUkwanyama,  nokukaleka po ombili eshi a kala ta xungu omalelo akwao omwenyo ngeenge e li moupyakadi.

“Meekulu nefimaneko linene, ohamba yange nai kale nomwenyo ule. Oshipundi shoye osho sho, onghee vakwetu nava twikile ko vali,” Nelulu ta ti.

“Omalelo makwetu nelelo paendodo adishe ahandi mu halele eenghono, oukumwe, ohole nelininipiko mokuwanifa po oilonga mwe i pewa kohamba.” 

Nelulu okwa kala ta wilike onga omunashipundi oule weedula 18 melelo lOukwanyama.

“Oshipundi shaUkwanyama kala po nombili ame nda ya,” Nelulu ta ti.

Moshipopiwa shaye ohamba yaUkwanyama Martha Mwadinomo YaKristian Nelumbu okwa ti okwa pandula Nelulu eshi a kala ta longo nodjungu pefimbo a kala  omunashipundi welelo laUkwanyama shaashi Nelulu okwa eta omalunduluko ahapu melelo.

Ohamba yaUkwanyama kakwa li shipu kuye oku shi itavela  ko, mokutala oule wefimbo olo va kala tava longo pamwe naNelulu nomaudjuu oo va kala nokushakeneka  momukokomoko wefimbo.

Onghee okwa uda nai eshi Nelulu ta fiye po oshipundi shelelo laYUkwanyama.

“Nelulu okwa kala e na oukwatya umwe uwa mokukala omuwiliki eshi ha kendabala okudimina po diva omunhu oo e mu udifa nai. Moilonga yaye okwa kedabala a kale meengaba dewiliko laye. Osho osho ndi wete she mu findanifa, nomolwaasho mounashipundi waye, elelo letu ola hanga omafindano ahapu,” Nelumbu ta hokolola shoshipala tashi di omahodi.

Nelumbu okwa ti Nelulu omunhu e na efimaneko nelixupipiko kovanhu aveshe ou  a kala ta longo nelitulemo okukaleka po ombili yelelo laUkwanyama.

Efiku tuu olo Nelumbu okwa u likwa elenga koshikandjo shaNandova Elia Kashidinge Waandja opo a kale ta kwafele onga omunashipundi welelo laUkwanyama fiyo omodula tai ya, omanga ta dilaadila kutya olye ta ka ulikwa a ninge omunashipundi.

Waandja okwa ti ota ka longa nelitulemo pefimbo loshinakuanifa eshi a pewa shokukala ta kwafela onga omunashipundi welelo laUkwanyama.

“Onda pewa oshilonga shidjuu shaashi kasha shi shipu okukala omunashipundi welelo laUkwanyama shaashi ouna okushakeneka omashonga ahapu,” Waandja ta ti.

Okwa ti otai indile omalelo akwao opo va longele kumwe naye nokukala yoo vali tave mu tulile mo omayele shaashi naye oha dulu okuninga omapuko.  fhamalwa@nepc.com