Epangelo laAngola ola yandja omaufemba kovakwashiwana valo ve fike po2 400 ve li moshitukulwa shaHangwena Etine kombelewa yoshikandjhoololo shaKongo.
Ovaangola ava ve lihanena oikandjohoololo ya yooloka moNamibia ova pelwe omikanda domaufemba ngaashi oumutwe needjapo domadalo.
Ova li yoo va pewa oukalata vomahoololo opo va dule okukufa ombinga momahoololo oo taa ka kala ko neudo muAguste koAngola.
Oshikandjohoololo shaKongo osho shimwe sha didilikwa shi na ovakwashiwana vaAngola vahapu ve hena omaufemba oshilongo shavo.
Kansela woshikandjohoololo shaKongo Efraim Shipindo eshi a ninga eenghundafana naKundana mEtitano okwa hokolola kutya ombelewa yaye oya didilika ovakwashiwana vaAngola ve liteela momikunda da yooloka mOkongo vehe na omaufemba oshilongo shavo.
Ta ti eshi osha eta opo a shivifile ombelewa youkaleliposhilongo yaAngola i li mOshakati opo i ninge po sha konghalo yovakwashiwana vavo.
Shipindo okwa ti ovakwashiwana vahapu ova ninga mo oule wefimbo lile mOkongo omo vahapu va mona eemhito doilonga.
“Ohandi indile ovayandji voilonga ve na ovakwashiwana vaAngola momaumbo avo opo va shivifile ombelewa yange, opo ndi dule okuninga omalongekido nghee tava pewa omikanda davo,” Shipindo ta ti.
Kansela okwa ti osha fimana komunhu keshe a kale e na omaufemba notashi ka pupalela ovayandji voilonga ngeenge ve na ouyelele kombinga yovanailonga vavo unene tuu ngeenge pa holoka oudjuu.