New Era Newspaper

Header ads
Icon Collap
...
Home / Ovakalimo vomolukanda Sky mOshakati va tembulilwa kOnawa

Ovakalimo vomolukanda Sky mOshakati va tembulilwa kOnawa

2021-04-08  Festus Hamalwa

Ovakalimo vomolukanda Sky mOshakati va tembulilwa kOnawa
Top of a Page

Ovakalimo ve fike 482 vomolukanda Sky mOshakati ova pewa onhele ipe apa paife tava ka tunga omaumbo avo. Ovakalimo ava otava ka tunga omaumbo avo kOnawa.

Mayola wodoolopa yaShakati Leonard Hango okwa ti ovakalimo ava va kala hava di muSky ove na okutembukila kOnawa opo va pewa edu lipe.

Hango okwa ti ovakalimo otava ka pewa olusheno oshali, omeva, edu lavo tali kalelele apa tava tungu. Ye ta weda po ta ti ovakalimo ava ova pewa osheendifo shoshali shokututa oinima yavo ngaashi oipeleki, eembete nosho tuu.

“Konhele oku ovakalimo vomuSky tava tembukile ihaku ya efundja, elelo lodoolopa yaShakati ola tunga oundjuu vovakwashiwana ava, onghee omayakulo aeshe oko e li kOnawa,”  Hango ta ti.

Omudo 2019 elelo lodoolopa yaShakati okwa li la yandja natango onhele ipe kovakalimo ava kwa li hava di kolukanda keemwandi ovo mongaha navo va tembukila nale kOnawa, ovo kwa li va pewa yoo omauwa ngaashi olusheno, omeva, noundjuwo, nedu lavo vene. “Otwa pandula unene eshi twa pewa edu letu lipe, naashi vali atu i konhele ipe oku ihaku talama omeva. Out na ehafo linene eshi paife atu pewa olusheno nomeva oshali shaashi ovanhu vamwe kakwa li tu na nomalusheno nokuli,” Justis Martina ta ti ngaho.

Martina okwa ti okwa kala oule womido 14 molukanda Sky nota holola omaliudo aye kombinga ikwao eshi ta ti oshi li eshongo lakula paife kounona vavo shaashi paife otava kala ve li kokule neefikola. Onghene okwa ti ounona paife ove na okweenda eendjila diledile tava di kOnawa va uka kofikola shaashi vati Onawa oi li kokule neefikola dounona vavo.

“Ohandi indile mayola wodoolopa yaShakati opo a yandje osheendifo opo shi kale tashi twala noku ka tala ounona vetu kenongelo shaashi fye ongaa ovadali vamwe itu shi wanifa okufuta oshimaliwa sholefa keshe efiku,” Martina ta popi nokuholola omadiladilo aye meenghundafana a ninga naKundana kwa li. 

Pexulilo Hango okwa kunghulila ovakalimo ava opo va kale veli kukole nomindilo osheshi omundilo owanyika oshiponga, nosho yo okukaleka po onhele yavo i kale ya yela.


2021-04-08  Festus Hamalwa

Share on social media
Bottom of a page