Ongeshefa yoRani group oya yandja outemba ve li 350 koitukulwa aishe 14 moshilongo. Outemba ova tambulwa ko keengoloneya da dja koitukulwa ya yooloka yomoshilongo Olomakaya mOshakati. Otava ka yandjwa koikandjohoololo aishe va ka kwafele ovanhu ve na oulema, mwa kwatelwa ovakulupe nounona.
Eshi, oshi li oshikando oshititatu ongeshefa yoRani Group tai yandje outemba eshi kwa li ya yandja outemba 40 kouministeli meameno netonatelo lokeengamba, nokouministeli wehongo.
Moshipopiwa shaye ngoloneya waShana Elia Irimari okwa tambula ko outemba nolupandu linene.
Irimari okwa ti outemba owa fimana unene shaashi otava ka kwafela ovanhu ve li momhumbwe youtemba ngaashi naanaa kwa didilikwa ku na ovanhu vahapu ve na oulema tava mono oixuna.
Okwa ta ti ombelewa yaye otai ka kwashipaleka kutya otai ka yandja outemba keembelewa dookansela vomoshitukulwa opo outemba u kale wa yandjwa kovanhu.
“Unene tuu komikunda oko unene kwa didilikwa ku na ovanhu ve li momhumbwe youtemba eshi hava kala tave lipweda medu, onghee outemba ava otava ka lundulula onghalo yovanhu vahapu shaashi itava ka kala vali have likoko medu,” Irimari ta ti. Pefimbo ta yandje outemba omukulunhu wongeshefa yoRani Group Ali Dharani okwa ti ongeshefa yavo otai lalakanene okushakeneka epangelo ondjilakati tashi pitile mokuyambidida oshiwana.
Okwa ti ongeshefa yoRani otai twikile nokuyambidida eeministeli da yooloka domoshilongo mwa kwatelwa oministeli yeameno noonakulwa vakulu, noministeli youhaku nonghalonawa.
“Onda pandula unene oshiwana eshi tashi twikile nokukalanda keengeshefa detu opo tu dule okukala twa mona oshimaliwa shokuyambidida ovanhu ve li momhumbwe,” Dharani ta ti.
Okwa weda po ta ti eengeshefa doRani Group odi li moitukulwa omuwoyi, odo da yandja oilonga kovaNamibia ve li 2 000 hava longo meefitola doRani Group.