Kansela woshikandjohoololo shaRuacana Andreas Shintama okwa kunghulila oshiwana shomoshitukulwa shaMusati opo shi xulife po okulongifa ovakwashiwana Ovaangola momapya.
Shintama okwa ti osha puka okulongifa ovakwashiwana vaAngola shaashi kave na epitikilo lokukala noku longa moNamibia. Ta ti vahapu vomuvo ovo veli hanena mOmusati, ove li vakela moNamibia va pitila koshi yodalate ile va pitila peemhalungushu opo inapa pitikilwa oku pitwa. Ta ti ovakwashiwana nava yandje kOvanamibia ve na oungudu vokulima shaashi mOmusati omu na eengudu dihapu dovanyasha dokuhelela omapya.
Onghee okwa ti osha fimana ngeenge oshiwana tashi yandje oilonga yokulonga momapya kovaNamibia opo va dule okulimona okamaliwa kavo komodjato.
Kansela okwa ti konima ngeenge Ovaangola ova pewa oilonga ka hole vali okushuna koshilongo shavo, omanga vamwe hava ka tala va kwao opo veu ye va kale mOmusati.
“Otashi eta edundakano lihapu shaashi paife Ovaangola ohava kala ashike tava longifwa kovanhu momapya nokukala tava li fifwa oimuna momikunda,” Shintama.
Shintama okwa ti Ovaangola paife ova ninga oihakanwa yokulonga oilonga yominyonena ngaashi okudipaa, okukwata ovakainhu onghonga omanga vamwe ova ninga oihakanwa yowila momeva ngeenge tava kongo ouxupilo.
Shintama ou eli yoo vali omunashipundi welelo lopaukansela mOmusati, okwa kunghulila oshiwana opo shi kale tashi lopotele oovene vomikunda ile eembelewa dookansela kombinga yovanhu tava yandje oilonga kOvaangola. Kansela woshikandjohoololo shaTamanzi Johaness Iyambo naye okwa hokolola ta ti moshitukulwa shaye omu na Ovaangola vahapu va pewa oilonga yokulonga momapya kovakwashiwana.
Iyambo okwa ti oshiwana oha shi kala tashi nu poundingosho Etilyasa nOtanombi konima ngeenge va futwa oshimaliwa eshi va lima omapya. Okwa ti Ovaangola vamwe ina hala vali okushuna koshilongo shavo eshi paife va dika onanda poundingosho Etilyasa. “Oshanyika oshiponga okukala ovanhu vai dilila ovakwashiwana vo vaAngola vehe shi apa va dja shaashi ngeenge omuAngola okwa xulifa ile a kwatwa koshidu otashi kala shi djuu okushivifila ovakwapata vaye shaashi kapena ouyelele kutya okwa dile peni,” Iyambo ta ti.
Kansela okwa weda po ta ti oshiwana nashi kale shili oupafi ngeenge tashi yandje oilonga kovaAngola shaashi ina shipitikwa kepangelo laAngola.
– fhamalwa@nepc.com.na