ONGWEDIVA - Omulumentu omunangeshefa gwomomapandaanda gomimvo dhopokati, ota hupile mokulanditha oofukwa.
Joseph Kanime a yambukile kOngwediva onkulu okwa ti oha landitha oofukwa dhomaludhi agehe sha ikolelela kethimbo.
“Ngashiingeyi otandi landitha oombundufukwa, ndhoka handi teleke ngame mwene, nuuna oofukwa dhaKashiwambo ndhoka hatu kutha momapya dha kukuta, tandi tameke ishewe nongeshefa yandje,’’ ta hokolola ngaaka.
Kanime ngoka ha landitha moondoolopa Oshakati nOngwediva okwa ti ongeshefa otayi ende nawa sigo oompaka.
Ta ti, oha landitha kooN$5 oshowo koN$10. Ta gwedha po ta ti, oku na oshiyenditho shombasikela ndjoka ha ende nayo ta landitha oshoka oondoolopa ndhoka mbali ohe dhi mana ko mesiku limwe.
“Ondi na omukumo nongeshefa yandje oshoka oyo tayi yambidhidha ndje, opo ndi vule okwiihupitha ngame ndaa kwatwe komadhiladhilo gokuninga oonyala oonde,’’ ta po pi ngaaka.
Ta ti, nonando ha tsakaneke omashongo mpeya naampeyaka ota pandula oshoka hago naanaa tage mu shololitha okutsikila noongeshefa dhe.
Kanime okwa gwedha po kutya ye natango omunafaalama goondjuhwa, ye natango oha hu iilya pethimbo lyokuteya.
‘’Ayihe mbyoka ohandi yi longo oshoka inandi hala okuhehela aantu sha, ihe onda hala okwiilongela ngame mwene,’’ ta popi ngaaka.
Ta ti, ngeno okwa li e na oshimaliwa shokuhumitha komeho ongeshefa ye, ngeno nena ye omunangeshefa omunene, ngoka ta vulu okukandula po omaupyakadhi goompumbwe dhiilonga moshigwana.