Uuministeli womidhingoloko owa yambidhidhwa niikwathitho yokulongela miihwa okuza kehangano tali ithanwa Bush Control and Biomass Utilisation Project.
Omugandji gomauyelele muuministeli moka Romeo Muyunda okwa ti iinima mbyoka ya yambidhidhwa nayo ongaashi ootenda, oombiga, omatalashe, iipundi, iitaafula, uundini womeya, ookompiyuta oshowo ooteyipa, ayihe kumwe oya pula ongushu yoshimaliwa shi thike N$477 000.
Ta ti, iilongithomwa mbyoka otayi ka gandjwa koombelewa dhuuminsteli womidhingoloko, okuyambidhidha mboka haya longele miihwa.
“Otatu ka longitha iikwathitho twa yambidhidhwa nayo, ngaashi naanaa ya nuninwa,’’ ta fatulula ngaaka.
Muyumba okwa li a tseyitha ngaaka sho kwa li ta kunkilile oshigwana kombinga yomapeya.
Ta ti, omalongo gomapeya omawanawa okugandjwa omanga ethimbo ndyoka haga holoka unene inaali thika.
Okwa ndhindhilikwa omahala haga mbugalekwa komililo dhombaadhilila, onkene oshigwana osha kumagidhwa shi kwate nawa omililo, omolwomililo ndhoka hadhi holoka ombaadhilila.
Oohekita dha adha po499 344 odha pya molwomapeya omumvo gwa yi okuza ethimbo omapeya haga pimbile muApiilili.
Momushangwa gwa pitithwa kuuministeli womidhingoloko, omakuti nomatalelopo owa pula aakwashigwana, aanafaalama osho wo ooyene yomaliko opo ya tule po omalandulathano ngoka taga shunitha pohi ompito yomililo hadhi tukuka moomwedhi dhi li komeho.
Muyunda okwa ti omapeya oga hanagula omaliko osho wo omudhingoloko oomvula dha piti.
Okwa fatulula kutya omililo ngadhika ohadhi taandelithwa unene kombepo, uupyu oshowo omwiidhi gwa kukuta, shoka hashi eta omulilo gu fike tagu endelele unene.
“Omumvo gwa yi omanga ethimbo lyomapeya inaali tameka, uuministeli owa li wa tula miilonga oshikonga shokushunitha pevi ompito yetaandelo lyomililo, sigo oompaka, ookilometa 33 odha li dha tulwa pamuthika gokukelela omulilo oshilongo ashihe, niilonga mbyoka natango onkene tuu tayi tsikile,” Muyunda ta ti ngaaka.
Uuministeli owa pula wo aayunguli yomakala gokutema opo ya iyuthe komilandu ndhoka dha tulwa po kuuministeli mo2022.
Uuministeli owa ti owa yambidhidha wo aakwashigwana sho taye ya pe omadheulo nomilandu mokudhima nokukeelela omililo.
-vkaapanda@nepc.com.na