Ovanhu 15 hava longo keenhele da yayooloka ova kanifa omaumbo avo eshi a kufwa po keembanga konima yoku kanifa oilonga molwa oCovid-19.
Kansela woshikandjohoololo shaWalvis Bay yokoushai Florian Donatus okwa ti ombelewa yaye oya kala nokumona elopota dihapu okudilila moshiwana eshi hashi kala sha ngudumana pombelewa yaye tashi nyenyeta kombinga nghee sha kufwa omaumbo keembanga shaashi ovanhu ihava longo vali.
Donatus okwa hokolola ta ti ombuto yoCovid-19 oya denga ovanhu vahapu moshikandjohoololo shaye shaashi va kanifa oilonga yavo.
“Ovanhu vamwe ova landa omaumbo nomukuli wombaanga pefimbo eshi kwali ve na oilonga ashike paife omaumbo okwa kufwa ko keembaanga shaashi omunhu ke na sha vali oyuuyemo yokufuta eumbo laye,” Donatus ta ti.
Okwa ti ovanhu vamwe ohava di meumbo veli vaheyali ashike paife konima eshi va kufwa eumbo ka vena vali apa tava ka dja.
Kansela okwa pula eembaanga opo di tule po eudafano noshiwana tete manga ina di kufa ko omaumbo. “Eembaanga nadi kale tadi popi novaleli tete manga ina di kufa etokolo opo tu ninge omalongekido nghee tuna okuyambidida ovanhu neenhele dokundja,” Donatus ta ti.
Okwa kunghulila yoo vali oshiwana ta ti nashi kale tashi lopotele ombelewa ya kansela pefimbo opo ombelewa yaye i kale ya ninga omalongekido diva.
“Ombelewa ya kansela oyo shiwana, keshe omunhu e na oupyakadi okwa manguluka okukala a shivifila ombelewa yange,” Donatus ta ti.