Omukainhu weedula 25, nounona vaye vavali, okamati komido nhatu nokadona komido hetatu ova xulifa eshi wa wila momeva.

Oshiningwanima eshi osha ningwa efimbo lokomatango mEtine komukunda Ontanda moshitukulwa shaMusati.

Onaakufya ova tongolwa ovo Lea Gomases a dile koGochas koshitukulwa shaHardap, nounona vaye John Shivute (3) naChandie Gomases (8).. 

Omukulunhu koshikondo shomakonaakono oimbuluma moshitukulwa shaMusati Deputy Commissioner Malakia Simaho okwa hokolola ta ti Gomases okwa li ta kendabala okutauluka oshana shiyadi omeva opo a ka talele po ovakwapata vaye hava di momukunda u li kombada yoshana.

 Pefimbo ta tauluka omeva omukainhu okwa li a umbata ounona vaye aveshe ashike mupya munene okwe lidenga po nounona vaye ndele tava xulifa.

Opolifi oya ti omeva okwa li male unene, ashike otashi ulike kutya nomukainhu kakwa li eshishi ngeenge opo a li ta kendabala a taulukile ope na omeva male.

Omalutu avo okwa twalwa kokila yoshipangelo shaTsandi novakwapata vavo ova shivifilwa kombinga yomafyo aa.

Omafyo omomeva ovanhu mOmusati okwa hanya neenghono, omo ovanhu tave lishilile po10 va fya moule woshivike shimwe. Vamwe vomoonakufya ovo omukulupe womido 78 Neshelo Wilbard Nauyoma omukalimo womomukunda Oshikuyu, Johannes Panduleni (7) omukalimo womomukunda Eenkundi naNdinonya Layapulwa Dimbulukeni Tangitate (11) womomukunda Olyavahenge, ava ova xulifa mexuliloshivike ladja ko. 

Opolifi onghee ngaho tai kunghulile oshiwana opo shi kale sha kotokela omeva shaashi okwa didilikwa oshitukulwa shaMusati sha ninga oihakanwa yovanhu tava file momeva.

– fhamalwa@nepc.com.na