Aalumentu aakokele yaali, gumwe oku na omimvo 53 namukwao omimvo 64, oya si sho ya ikutha oomwenyo, gumwe omOhangwena namukwao omOshana.
Sha ikolelela komupevi kuluntu gwopolisi moshitopolwa shaHangwena Zacharia Amakali okwa ti, omulumenutu ngoka okwali gumwe gomwaamboka kwali taya tungu meembelewa dhelelo lyondoolopa yEenhana.
Ta hokolola kutya omulumentu ngoka okwa anuwa a imangeleke nomwinya, moombuli dhombashu moka kwali hazi pakathimbo, omanga ta longo.
Inathiga a shanga shoka shemu ikuthitha omwenyo.
Nakusa okwa tseyika nedhina Matias Kakololo.
Shika osha holoka ashike omasiku omashona sho omukulupe gwomimvo 64 a imangeleke momukunda Uukwangula moshitopolwa shaShana.
Okwa tseyika nedhina Jackob Nakatse Itengula.
Opolisi yaNamibia, okupitila mooradio oya kumagidha aakuluntu nosho wo aawiliki yi ili noyi ili moshigwana, ya kuthe ombinga mehungomwenyo lyoshigwana, unene tuu shoka shokomongula.
“Ondi wete oshigwana oshi na oku uvithwa ko nawa ehungomwenyo, kutya ngele omuntu ou na uudhigu, okwiimangeleka, nenge okwiikutha omwenyo, hasho ekandulopo lyomukundu, ihe oku gu eta po ashike,”” opolisi ya popi ngaaka.
Onkee opolisi otayi ndile koshigwana shi kuthe omukalo gwuukwawowanankali nokukala tashi popi nokuninga oonkundathana, uuna pwa holoka omaudhigu, omaupyakadhi nosho tuu.
Molopota yiiningwanima hayi holoka mehuulilo shiwike, oshiwike sha ziko omwali mwa lopotwa omayikotho goomwenyo ga yooloka oshilongo ashihe.
Opolisi oya popi kutya shoka shi li konkumbi osho ngaa nani shi li wo kEwale, noyi wete kutya oshigwana oshi na okwiikala popepi nomaipukululo, omahungomwenyo, omakumagidhathano nomaikwathelathano, opo kuhulithwepo omaimangeleko, omaiyaho, omaiyumbilomomeya nosho tuu.
“Kehe esiku oshigwana otashi lili, omolu omaimangeleko ngoka taga pula komeho mokati koshigwana,’’ ya popi ngaaka.
Yamwe ya popiwa nayo koshifo shika otaya ti kutya oshigwana oshindji unene tuu shoka oshigundjuka otashi imangeleke molwashoka oshi na omaudhigu ogendji, unene gwokwaa na iilonga, omahupilo, oosikola noshowo omahala gokukala noye li ashike taya elaela kaye na shoka taya longo.
Omanga omaudhigu gomomagumbo nogiihole, nago wo taga dhana onkandangala momaidhipago goludhi nduka.
–vkaapanda@nepc.com.na