Opolisi moshitopolwa shaShikoto oya ti oyi li metifa okukonakona oshipotha shoka sha li sha patululilwa aantu yaheyali, sho ya li ya mangele okanona kokakadhona komimvo 15 momuti noku ka dhengagula. Omugandji gomauyelele gwopolisi moshitopolwa shaShikoto Nehal e Kangulu okwa ti o s h i n i n g w a n i m a shoka osha li sha holoka omasiku ga zi ko momudhingoloko gwaLukonda. Otaku hokololwa kutya okanona hoka oka li anuwa ka yaka oshimaliwa N$200 shagumwe gwaamboka ya li ye ka dhenge.
Nehale okwa ti aantu ayehe yaheyali oya li yi igongele ee taya mangele okanona hoka momuti, noku ka dhengagula, anuwa ka popye kutya oshimaliwa shoka oke shi longitha shike. Ayehe oya li ya mangwa po kopolisi, noya pewa ombooloha yoshimaliwa N$300 kehe gumwe, Etitano lya zi ko. Opolisi oya ndhindhilike omahepeko taga ningilwa aanona momagumbo ga yooloka taga indjipala.
Otaku kumagidhwa oshigwana shi kale aluhe tashi lopota iiningwanima ayihe kopolisi yi li popepi opo ku kuthwe onkatu yomeendelelo.
Opolisi oya ti aanona naya fatululilwe oompango nuuthemba wawo momagumbo, opo ya kale taya lopota kehe shoka ye wete kaashi li mondjila. Tayi ti oyendji oya taalela omahepeko ga yooloka momagumbo ihe oye na uumbanda woku ga eta puuyelele.
Nehale ta gwedha po kutya aanona naya koneke kutya omaupyakadhi nomahepeko ngoka otage ya ashike pehulilo uuna taga lopotwa.
Omumvo gwa zi ko opolisi moshitopolwa shaShikoto natango oya li ya lopota omulumentu gwomimvo 51 a li a mangwa po sho ta tamanekelwa omahepeko gomomagumbo. Omulumentu ngoka anuwa okwa li a dhengagula okanona kokadhona komimvo 18 noku ka manga nomalyenge mothingo.
Oshiningwanima shoka anuwa osha holoka momukunda Onekaku momudhingoloko gwOshigambo. Okanona hoka anuwa oka li ka ningi okanelago sho kwa li ka yambidhidhwa mbala komushiinda ngoka a li e ku uvu sho taka kugu.
Otaku hokololwa kutya okanona hoka oka li ka dhengwa kuhekulu tango noongonyo, nomankawo oshowo okuthangagulwa shi nyanyaleka.
Omulumentu ngoka okwa li e ka manga mothingo, te ka mangele momuti nelyenge e te ka thigi miihwa taka kugu.
vkaapanda@nepc.com.na